He panel ah hian Mizo thawnthu a khawvel lo pian chhuah dan ni a piputen an rin chu tarlan a ni a. Khuazing nu in leilung a duang lai te, nungcha chi hrang hrang leh Thlanrawkpa leh a chhungte chu kan hmu thei ang. Hauhulh lal thlarauin thla lem a tum lai pawh a background-ah a lo lang a. Khuarel thil lo insiam dan leh lo in tan dan ni a kan pi leh pute lo sawi thin dan chu he panel-ah hian entir a ni.
Mizote lo chhuahna bul ni a an sawi thin “Chhinlung” chu kan hmu leh ang a. Zohnahthlak hnam hrang hrang te chu Chhinlung puk atanga lo chhuakin, khawvel eng a vawikhatna atan an rawn hmu a, mak tih hmel tak tak te, hlauh hmel tak te leh a then lawm hmel tak te pawh kan hmu nawk awm e. Kan en zel chuan Mizo thawnthu a milar tak tak te leh chetvelna kan hmu thei ang. Chhurbura, Mualzavata, Chemtatrawta, Liandova te unau, Chawngtinleri leh Sichangneiite lem chu tarlan an ni. Heng thawnthu hluite hi kan hnam rohlu an ni a, kan Mizo identity innghahna lungphum pakhat ti te pawhin kan sawi thei awm e.
Art leh culture hi thil inhne reng, inzawmna thuk tak nei an ni a. Culture darthlalang chu art a ni a, culture chu art hmanga puan chhuah a ni thin. Mizote pawh kan hnam ziarang leh khawvel thlir dante, thawnthu hluiah te, hnam lamahte, thiam hnang deh leh thil dang dang te ah hian hmuh theihin a awm a ni. Heng hnam rohlute hi kan vawn that dan leh, an laka kan rilru put zia in Mizote hnam ziarang than chhoh zel dan tur chu thui takin a hril dawn a ni.
