Vawii July 7, 2023 khan Azadi Ka Amrit Mahotsav Programme - Visit of Heritage Site hmangin Mizo lal hmingthang Lungleng Lal Khamliana In, Lungleng khua-ah hun hman a ni a. Pu Gen Khan Do, Jt. Director, Art & Culture hovin he hun hi hman a ni. 

Khamliana hi Lungleng lal, Lianlula thlah te zinga Lalngura Sailo fapa a ni a. 1864 khan Mizoram chhimthlang lam khaw pakhat Thehlep ah a piang a. A pa in a thihsan hma avangin a Pu Savunga Sailo kiangah a khawsa a, a Pu Savunga hi lal fing leh fel tak niin British ho kha thian a lo siamtu hmasa a nih avangin Khamliana pawh hian a vanneih phah a. 1880 khan British ho khan Lungleng ramah an lal tir ta a ni. Zosap ten sikul an hawn tirh khan lal pathum in A, AW, B an zir a. Durtlang lal Suaka, Chaltlang lal Thangphung leh Lungleng lal Khamliana te hian an zir a. Ni 12/13 vel lek a zir hnu chuan ziak leh chhiar chu a thiam ta mai a.Mizo zinga ziak leh chhiar thiam hmasa ber 3 te zinga mi a ni ta a ni. Khamliana hian June ni 16, 1897 khan ama kutziak ngei in Queen Elizabeth hnenah kum 60 a lal lawmpuina lehkha a thawn bawk. Hei hi Mizo lehkha ziak kan hmuh theih hlui ber a ni. Khamliana hi Mizo zinga rangva in nei hmasa ber a ni a, 1918 khan rangva in a nei tawh a, 1930 khan Mizoram a In tha ber tih theih tur a sa leh a, he a in sak nan hian Rs.15,550/- lai a seng a ni. Amah hi Lal nimahse a in satu te hi tumah a thlawn in a chhawr lo va, hlawh a pe vek thin. He a in sak hi tun thlengin mi ten an la tlawh huai huai LUNGLENG LAL IN tih a kan hriat lar hi a lo ni ta a ni. He a in sak hi Mizoram a house No.1 pu a ni nghe nghe. Khua leh tui enkawl chungchanga mi thahnem ngai chungchuang te hnena tangkapui KUMPINU in a pek thin 'KAISER-I-HIND' medal chu 1923 khan a dawng a. Mizo te zinga hmasa ber nihna tamtak neiin, engkima Zofa te tana sul sutu niin kum 50 chhung ro rel in Khamliana mi taima leh entawn tlak chuan 1945 December ni 27 khan kum 81 mi ni in he khawvel hi a lo chhuahsan ta a ni.