Vawiin May 6, 2025 chawhma dar 10:30 khan Tribal Research Institute, Art & Culture Department bul tumin Department of History, Govt.’ Aizawl West College leh Department of History, Pachhunga University College te tangkawp-in an buatsaih ni hnih chhung awh tur 'Mizo ei leh in chungchang zirchianna' -  ‘International Seminar On Mizo Foodways: Cultural Traditions, Societal Transformations, and Political Dimensions Across Time chu Government Aizawl West College-ah neih tan a ni a, Pu C. Lalsawivunga, Minister, Art & Culture department chuan Khuallian niin a hman a pui.

Seminar hawnna inkhawm hi Pu F. Lalthanmawia, Joint Director, Art & Culture Department chuan a kaihruai a; Dr. Malsawmdawngliana, Asst Prof., Govt.’ Aizawl West College & Co-ordinator chuan report a pe a,  Dr. Rohmingmawii, Associate Professor, Dept. of History, PUC and Co-Coordinator chuan Seminar Theme sawihawnna neiin Prof. C. Lalthlengliana, Principal, Government Aizawl West College chuan thu a sawi bawk.

Khuallian Pu C. Lalsawivunga, Minister, Art & Culture Department chuan hawnna thusawiin, ‘Zohnahthlak hnam hrang hrangte hi tlang hrang hrangah awm mah ila inkungkaih vek, inphiarzawm tlat -  Closeknit Society ni tura a siam kan ni a, he kan hnam ziarang nghet taka inkungkaih kan nihna hi a bo hunah chuan he hnam hi a thi ve tial tial thei ang. Sechhun Khuangchawi leh a dangte avanga tlang hraia ruaitheh thin hnam khan Kristian kan nih hnuah Krismas leh kumthar ruaitheh kan uar chhunzawm a, lungthu pathum chunga eirel thin Mizo te kha chhiat that engkimah chawhlui kil ho thin an ni a, chu chu an inlaichinna ti nghet tu a ni. Vawiin thlengin chhungkua, thenawm khawveng leh khawtlangah pawh chhiatni thatniah chawhlui kan la kilho zel a, kan la chhawmnung zel a ni. Kan ei rel dan te, kan ei ho dan te hmanga kan inpawhna leh inzawmna hi kan khawtlang leh hnam tan chakna leh nghehna a ni a, chawinun zel hi tha ka ti hle a, chu chu kan khawtlang leh hnam ti pumkhat tu leh tichak tu a ni reng dawn a ni’, a ti.

Khuallian chuan sawi chhunzawmin, “tun tum kan seminar kaltlanga Mizo food culture kan zirchianna hian kan nihphung, kan culture leh tradition kan zir zau leh hriatzauna kawngah rah tha tak a chhuah ngei ka beisei tlat a, kan sawrkar pawh hian Mizo tobul te chhui a, kan culture te zirchiang tur hian Research Committee te pawh Chief Minister hmalakna leh ama ho ngeiin din chhoh mek a ni a, tuna kan seminar pawh hi Tribal Research Institute, Art & Culture Department kaltlanga chu hmathlir tihhlawhtlinna chu niin ka hria a, ka lawm hle a ni’, tiin Seminar hi a hawng a, Pi Zirsangzuali, Senior Research Officer, Tribal Research Institute, Art & Culture Department chuan lawmthu sawina hun a hmang bawk a ni.

‘Mizo ei leh in chungchang zirchianna’ -  International Seminar on Mizo Foodways: Cultural Traditions, Societal Transformations, and Political Dimensions Across Time -ah hian thupui chi hrang hrang sawm pakhat (11) hmangin mithiam ten paper an present a, Mizoram University leh College hrang hrang atangin mithiam rualten paper an present bakah Assam Global University, Guwahati; Duke University, North Carolina, US; East-West University, Chicago, US; Department of Sociology, University of Hyderabad; Department of Sociology, Tezpur University atang te in mithiam te paper ngaihthlak a, zirho a ni bawk. Heng bakah hian mithiam hrang hrangten thupui hran theuh nei a ‘Mizo ei leh in chungchang zirchianna’ hmanga thu an ziak sawm pali (14) te chu la khawmin lehkhabu-a buatsaih tum a ni bawk.

Seminar hi naktuk May 7, 2025 hian Govt Aizawl West College-ah chhunzawm tur a ni a, Seminar kharna inkhawmah hian Prof. Lalthanzara, Principal, Pachhunga University College chu khuallian a ni ang, Pu R.K. Lalawmpuia, Special Officer, TRI chuan thu a sawi ang.