He panel ah hian Mizote khawsak zia chi hrang hrang leh an hmanrua leh bungbel te tarlan a ni a. An nitin khawsak an rel lai niawm tak kan hmu a, nu hovin la an her a, naupang an infiam a, ti buaitu awm lo ang maia an khawsa kan hmu a. Amaherawhchu an khaw tualah ngei chuan pawnlam atangin an nunphung kal tluang lai lo tibuai thei tu tur an lo lang a.
He ta kan milem hmuhte hi a taka thil thleng (historical fact) behchhan a, chumi lai lem chu a ni e, ti a siam an ni lo va. A entir zawk a chu mihringten kan hriat ngai loh leh hriat thiam loh thil alo thlen a kan lo dawn sawn dan entirna chi khat a ni. History-ah chuan hnam hrang hrang indona leh ram lak chungchangte kan hre thin a. Hetah pawh hian kan Mizo nunphung kal lai chu pawn lam atangin rawn runtu an awm a, chu chu mihring chi hrang hrangin an lo dawnsawn dan a inang lo hle a ni tih kan hmu thei ang. Hei hi history chang ni lo vawiin thleng hian pawn lam atanga min run tu thil chi hrang hrang a tam hle a, engtin nge heng thilte hi kan lo hmachhawn ang tih chu kan in zawhna ni theuh se la.
