September 18, 2026 (Zirtawpni) khan Art & Culture Department leh Bungzung Branch YMA te tangkawp buatsaihin Bungzung, Champhai District-ah Cultural Meet neih a ni. Pu C. Lalsawivunga, Hon'ble Minister, Art & Culture Department chuan Khuallian niin a hman pui a; he Cultural Meet-ah hian Bungzung khaw chhehvela YMA  Branch hrang hrang te an tel a ni.

Bungzung a Cultural Meet hi Pu Laltlansanga,  President, Bungzung Branch YMA chuan a kaihruai a; Pro Pastor RV Lallawmzuala, Vanzau Pastor Bial chuan hunserh a hmang a, Pu T.Lalchhuanawma, Secretary, Bungzung Branch YMA chuan Report a pe a, Pu F. Lalthanmawia, Joint Director chuan Cultural Meet neih chhan leh Art & Culture hmalakna te a sawi a; Pu Lallawmawma, Bungzung Branch YMA Executive Committee Member leh Tuipuiral Group YMA Vice President ni bawk chuan lawmthu sawiin hun a hmang bawk.

Khuallian Pu C. Lalsawivunga chuan thu sawiin mahni culture hloh lova Mizo nihna leh nun zemawi humhalh a, vawnghim tur leh Pi leh pu atanga Mizo tlawmngaihna kan neih hlu tak hi par vul tir turin a sawm a. Ai upate zahna vawng nung tura zirtirna nei thar tur leh kan hnam nun zemawi chu vawng nung deuh deuh turin kalkhawm te a fuih a ni.

Cultural Meet-ah hian heng YMA Branch - Bungzung, Sesih, Leithum, Leisenzo, Zawngtetui bakah Bungzung Branch MHIP, Bungzung Branch MUP, Govt. Bungzung H/S, Govt. Bungzung M/S leh Bungzung Centenary School te an telin, Mizo hnam lam chi hrang hrang an entir bakah  Govt. Bungzung P/S in Costume Parade leh Chheihlam an entir a,  zai mawi tak tak ngaihthlak a ni bawk. 

Cultural Meet hi a hlawhtling hle a, Bungzung leh a khaw chhehvel a miten an hlut hle a ni.