He panel hi vei lam atanga kan en tan chuan, hmanlai Mizo piputen mitthi thlarau zin kawng an tih chu kan hmu ang a. A hnuai lamah hian naupang thlarau chuan amah kawng kawh hmuh tura an phum tel artui chu a hmaa hlumin hma a hruai a. A hnungah Rihdil lo langin he dil hmingthang tak hi mithi thlarau te chuan an pan thin niin an sawi a. Rihdil chungah hian sava chi khat Rihar an ti chu alo lang bawk a. A dinglam sirah hian pa pakhat rihartui phur lai lem kan hmu a, hmanlai kan pi leh pute chuan rihartui phurh chu thil thiang lo, kal pawh sawt thei lo va mahni sukna ngaia suk reng theihna ni hialin an ngai a, an duh lo hle thin a ni. A chung lama kan en chhoh chuan mithi thlarau ten khawvel an ngaihna leh hawikir an chakna ti reh turin hawilopar an tawn lai leh lungloh tui an in lai kan hmu leh a. Tichuan mithi thlarau chu kalzelin Pialral kawtchhuah a thleng a, tah chuan mipa puitling tawh phawt, damlaia thangchhuah lo emaw, nula la ngai lo chu Pawla chuan an dulah a sairawkherh chuan a lo sai pawp ta thin a, chu chu an hlau em em thin a ni.
Thlarau lam khawvel atanga pipute nun lamah let leh in mithi thlarau kalkawng zawhah hian salu in vuak thlak sak lail em kan hmu a. Hei hi hmasang kan pipute indo dan chi khat a ni a, chibila an khawsak hnuin hnamtinte chuan sakhua biakna vawklu chu khawlaiah an tar thin a. Hei hi an in vuakthlak sak ta thin niin an sawi a, chutah chuan chi inangte chu tang ho va in tel mukin an awm hrang ta hlawm niin an sawi. A dawt lehah chuan chibil a kan khawsak hnu hun engemaw zah a liam hnuah Lal ropui tak takte hnuaiah insuihkhawmin zohnahthlak hrang hrangte khaw khata an chen za thu kan hre leh a.
Heng hun laia sawi hlawh tak pakhat chu lal hmingthang tak Vanhnuailiana khua Tualte chanchin hi a ni awm e. Tualte vanglai tih hiala an sawi thin chu tun thleng a mite sawi a la tling a, mi huaisen Zampuimanga sakei sat tur te, chak hmingthangte, zawlbuk leh lal in ropui tak tak te he panel-ah hian entir an ni a. A hnung lam kan en chuan Tualte khua-a sava lo thlawk lut chu a khaw mipui tam takte chuan an au luai luai a, thlawh ngaihna hre lo va an au thla lai lem kan hmu thei bawk ang.
He panel a kan hmuh theih lo lang leh chu Mizote hnam bila kan khawsak tan hun lai, sakhua leh hnam zia ang zawng pawha mu leh mal kan neih chhoh tan lai hun a ni a. Mumang ang riai a kan hriat tawh thawnthu leh thil thleng ngeite in pawlhna kara Mizo nun zia lo lang chu a pawimawh hle a. Vawiin thlenga kan la sawi ban theih loh leh an nun kan en let a Mizote Mizona ni bera kan sawi fo thin chu heng hun lai chanchinte hi an ni.
