Art and Culture Department, Mizoram, Government of Mizoram, India

Vauthla ni 1, 2024 khan Sipai Lammual-ah Chapchar Kut, 2024 chu ropui taka hman a ni a, Pu Lalduhoma, Chief Minister chu Kut Pa a ni a, Pu C. Lalsawivunga, Art & Culture Minister chu kut thlengtu a ni.

Kut Pa Pu Lalduhoma, Chief Minster chuan thusawiin, ‘ Kan pi leh pute khan mahni hun theuhvah hun harsa tam tak an paltlang a, indo an ching a, tam a tla fova, hripuite a leng a. A hmachhawn turin ramthuam tha an nei lova, daktawr an nei lova, ram pawn atanga chaw an chawkluh thu kan hre ngai lo. Nimahsela, "Dam leh tlang khatah, thih leh ruam khatah" tiin hun harsa an hmachhawn a, tampuimitthi an tawhin "Sem sem dam dam, eibil thi thi" tiin an inpeizawn leh a. Nun ze mawi taka nungin khawtlang an inkhaichhuak thin. Chu nunzia chu ram leh hnam din nana ralthuam tha ber a ni a, vawiin thlengin a la ni reng a ni, a ti. Chuvang chuan kan zonun ze mawi te kha chawi nung thar leh ila, kan nunphung tha lo, vawiina dinhmun tha lo taka kan khawtlang nun min siamtute hi i kalsan ang u, tiin Zofate a sawm a. Ram leh hnam tluchhe mek hrethiama, thahnemngai taka siam that tuma beitu mi sang tam tak an awm tih tarlangin, chung mite hnenah chuan " nghet takin lo ding ula, lo zam lo ula, lo beidawng reng reng suh u. Kawng dik zawh turin kan pal hi a tliak lo a nih vaih chuan kan Ngal zawk tal a tliak ang tiin, tlak huamin thil tha tih kan ngam a ni" a ti.

Kut thlengtu hi Pu C. Lalsawivunga, Minister, Art & Culture a ni a. Kut thlengtu hian hlim taka kut hmang turin kalkhawmte a sawm a, tha taka mawhphurhna hlen tute chungah lawmthu a sawi a ni. Hun khatna hunserh hi Pastor Biakzidinga, President, 7th Day Adventist Mizo Conference in a hmang a, Pu Lalhmachhuana, President Central YMA chuan inlawmna thu a sawi a. Zai, lam, Sakei lu aih leh lengkhawm zaite entir zui a nih hnuah hun khatna bik hi Pi Carol VLMS Dawngkimi, Director, Art & Culture chuan lawmthu sawiin a khar a ni. Chapchar Kut hmang tur hian state dang atangin mi engemawzat an rawn kal a. Kut chhimtute zingah hian Pu Bhausuan Ger, Taiwan ram palai leh a nupui Pi Hui Chen Chen te pawh an tel a ni.

Mizoram hmun hrang hranga Chapchar Kut hmannaah mipui an thahnem hle a. Hnam lam leh zai, Mizo Infiamna, Hnam thuam entir te leh Hmanlai Mizo nun chi hrang hrang entir te in hunh man a ni a. Chapchar Kut hmanna pui ber Aizawl-ah hian Sipai Lammual Gate Atanga Vanapa Hall inkar chu lirthei tlan theih loha siam niin Eitur zawrhna, Hnam thuam zawrhna leh dawr chi hrang hrang te siamin pho chhuah a ni a, Vanapa Hall kawtah Mizo Infiamna buatsaih a nib awk a, mipuiin an hlut hle.