Hmanlai chuan ramhuai an tam em em a, mihring an tibuai fo a. Hnathawk lova ram riakte pawh an tihthaih fo thin. Ramhuaiho zingah chuan an mi huaisen chhuantawlawl chu tuna kan hmuh mek Hmaidungseia hi a ni. Tum khat chu ramhuai hovin Vawrsela pa an tibuai a, an ngam leh ta si lo va. Chumi tum pawh chuan an inthlamuanna ber chu Hmaidungseia hi a ni. A kimchang zawkin: Hmanlai chuan ramhuai hi an tam em em a, mihring hi an tibuai fo a. Inah pawh mi tihbuai chang an nei a. A tam ber erawh chu ram lamah mihring an tibuai thin a. Hnathawka lova ramriak te hi a changin an tihthaih a, an riahna thlâm te hi a changin an vawm a, a changin an sawi vak vak a. Pa dawih deuh chu hnathawh tul lai pawhin ramah an riak ngam lo fo a ni. Chung hun lai chuan pa huaisen tak mai, Vawrsela pa an tih hi a awm a. Kum khat chu an ram theh lamah chuan ramhuai an inlar nasain, mi an tihthaih nasa hle a, mi tam tak chu ramah an riak ngam lo a. Vawrsela pa erawh chu mi huaisen tak a nih avangin a duh hunah chuan ramah a riak zel tho a. Nikhat chu a pipu suiha uai tum an lo kal a, a phal Mizo lohte hian an chhaih a, Vawrsela pa bawng, an ti a, naupang leh raipuar chenin an chhaih a. Chutianga an chhaih chuan a um a, a man hman te chu a vaw hrep thin a. A man dawn hi chuan, ‘Vawrsela .... bawng,’ an ti kha, ‘bawng leh lo,’ an ti a, a huat loh deuh an ring a ni ang. Vawi khat phei chu amah rawn chhaihtu ramhuaiho chu a um a, ramhuai nu raipuar teuh tlan hlei thei tawh lo chu a nangching a Chung raipuar te lai lai chuan, ‘Vawrsela pa. bawng,’ tiin an chhaih a, a han um phak dawn chuan, thaw hlawi hlawi chung hian ‘bawng leh lo, he, he, he, leh lo,’ an ti thin a. A thilte pawh hi an sawisaksak bawk a, a ei turte hi an ti let rem rum a. A chaw chhum sate an lo ei khalh a, an tidarh nuaih zel a. Vawi khat chu mai a chhum a, ramhuaiho chuan ei ve an chak hle mai a. A hlawp hlawpin an lo kal a, a chhuang fel chauh tih atangin “Vawrsela pa, i mai chhum a hmin tawh em?” an rawn ti chhen a. “La hmin lo tih tih pawha in ninawm,” a ti a, a um darh ur ur thin a. A huaisen bawk a, an ngam meuh lo a ni awm e. Chutia Vawrsela pan a um chiam chuan, a mai chhum chu ei an chak bawk si a, ramhuaiho chuan, an mi huaisen chhuantawlawl, Hmaidungseia an tih chu Vawrsela pan a ngam an ring lo a. “I mai chhum ei phal lo mah la, Hmaidungseia kan pun ang a, kan ei tho tho,” tiin an vau a. Vawrsela pa lah chuan, “Nangni hmai dung seia leh sei lova ka hre lo, in duh leh pun dung sei rawh u,” a tihsan mai a. Tichuan a mai chhum pawh chu a vil zel a. Ramhuaihoin ‘I mai chhum a hmin tawh em,’ an tih tirh kha chuan a la hmin lo reng a. An mi huaisen Hmaidungseia chu an rawn pun ta tak tak a. A rawn thlen chuan Vawrsela pa chuan a mai chhum chu a lo suan hlim hlawt Mizo a ni a. Hmaidungseia tih takah a hmai dung a sei hle mai reng a. Vawrsela pa thlam kawngka biang hnuai lamah chuan Hmaidungseia chuan a khabe a hlang a, a lu chhip chuan kawngka biang chung lam a tawng run mai a. Chutah Hmaidungseia chuan rawl thum tial chher chhuk mai hian, “Vawrselpa, i mai chhum a hmin tawh em?” a han ti a. Ramhuaiho chuan Vawrsela pan a ngam an ring lo a, an lo enthla thuap mai a. Chutah Vawrsela pa chuan, awrawl pangngai tak hian, “Aw, hmin tawh e, i ei duh em ni?” a ti a, Bel mawng depa mi, mai tlang lian sa ber mai chu a zu phawk chhuak lawk a, ‘Kha’ tih pahin Hmaidungseia hmaiah chuan a vawm bei thlawrh a. A sa ti lutuk na ti chu a te ta chul mai a. Chu veleh ramhuaiho chuan, “E, Vawrselapan Hmaidungseia a sawisa, kan Hmaidungseia pawhin Vawrsela pa chu a ngam lo,” an ti a, an tlanchhe ta dur dur mai a. Chuta chin chu ramhuaiho chuan an ti buai ngam tawh lo, an tih chu.
