HNAMCHAWM IN (MI NARAN IN)
Hnamchawm In danglamna ber chu an tualah Seluphan a awm lova, Leikapui pawh a awm bawk lova, tukverh leh kawmchar kawngka a nei lova, mawl tawp a ni mai. Sumhmun leh Leika/Luhka vel chu in dang ang tho a ni a, Archhiar te, Artuibawm te, sum leh suk te pawh a awm ve vek a, sumhmun chhak lamah chuan thingkhawn, thing tuah tur dahkhawmna a awm. Sumhmun bang chhung zawkah chuan sa lu an kah ve emaw, an awh emaw lu ro te chu an neih ang ang a intar ve tho bawk. Kawngka mau phelsep kalh, a tawlha tawlh hawn an hmang ve mai. Tuium hunna hmun pawh in chhung han luha thlang lam kilah dahin chumi dawt bang thlang chu chhuar, bungbel dahna a ni. Chhuat lai tak zawn chhak lam bang si chuan Tapchhak siam a ni a, dawhthleng leh dawhchho te pawh a awm ve thlap a, tapchhak atanga kawngka lam chu Khumai a ni, khum ta deuh a awm chawk a, a hnuai chu thingtuah tur an lak luh an dahna ber a ni. Tap chalah chuan Saum bur leh chi burte an dah thin. Rap chu buh hak tanna a ni mai a, Rappui chungsang chu hnang tal leh Hrei-ha tur leh thil dang dang dah hnawk rup na a ni. Tapchhak atanga kawmchar lam chiah chu, khumpui hmun a ni a, a In neitu nu leh pa leh an fate zawng zawng mut khawmna a ni. Khum mawng lamah chuan bang siin khum ban chu an siam mai a, mahse khum lu lam, chhuat lam khum ban chu rawpui lian angreng tak an hmang thin. Khum ban chu khanchhukah an tawn bet a, chumi rua chu an rek kaw thluah a, chu chu ‘Tungchaw’ chu a ni. Nu leh Pa tuibur al dahna ber a ni, naupangin kawi te pawh an lo dah ve chawk bawk. Khumpui dep kawmcharah chuan chhuat chanve thleng bang an siam a, chu chu Banglai a ni, silai an dahna, fei an thiahna ber a ni. Khumpui lu-ah chuan nu ber Thul an dah thin a, chu chu an puan thulkhung leh ting duangte leh an rohlu neih chhun chhun an dahna a ni. Banglai leh kawmchar bang inkar awl chu, Banglai chhung an ti a, eng eng emaw dah hnawk rupna a ni a, a thim duh hle, naupang chuan inchhung rau rauah chuan an hlauh lai ber a ni. A chhuat chu a tlau mai a ni a, mikhual leh inleng ho mutna leh thutna a ni mai. Chhuat chung khanchhuk-ah chuan rawphel leh mau velte an kham hnawk vel a, chu chu ‘Thehlan’ a ni. Em lian deuh leh bawmrangte dahna a ni a, vaimim te, buhtun te an thar chuan hetah hian an dah thin.
