Khuavang
Van lama chenga an sawi ngaih lem loh Khuavang leh minhring inzawmna hi a thuk hle a. Khuavang hi chi hrang hrang Mizo pi leh pute khan an nei nual a. Tuna kan hmuh mek hi Mihringte chunga malsawmna thlen theitu, mihringte chunga thu neitu, pasalthate zawla damreina chena pe theitu a ni. Khuavang hi kan lo hriat thin dan leh ngaihruat dan at ang chuan Lasi nen te pawha inhnaih tak ni maiin an lo sawi ve thin a, mahse, kan Kungawrhi thawnthu atanga thlir chuan Lasi nen chuan thil siam hrang daih an ni thung. A kimchang zawkin: Kungawrhi thawnthua khuavang: Kungawrhi thawnthu-ah chuan Kungawrhi chu Keimi-in bumin nupui atan a neia chumi chhanchhuak tur chuan Phawthira leh Hrangchala te unau chu an kal a, an tum ang ngêiin an chhanchhuak ta a, an haw kawngah chuan khua a thim tak avângin hmun remchângah an riak ta a ni. An riahna hmun chu Khuavang ho lamthuam thum a lo ni a, a hlauhawm avângin an unau chuan Kungawrhi chu an inven chhâwk ta a ni. Nakin deuhah chuan khuavang ho chu an rawn kal a, “ Tu maw, ka lamthuama riak?” an rawn ti. Phawthira chuan, “ Phawthira leh Hrangchala, Phaipheng bula kamkei lu Mizo kan tuk sawk sawk, kan sah sawk sawk,” tiin a lo chhang a. Khuavang ho chuan “huai aw, huai aw,” an ti a an hnaih zui zel ngam ta lo a ni. Khawvar dâwnah chuan Phawthira chu a mut a lo chhuak ta a, Hrangchala chu kai thoin a mu ve ta a ni. Khuavang ho chu an rawn kal leh a, Phawthira an zawh ang bawkin an rawn zâwt ve leh a, Mahse, Hrangchala chuan a lo hlau em em mai a, tah aw tuau hian Phawthira chhan dan angin a lo chhang ve a, chu vêleh khuavang ho chuan “ dawih aw, dawih aw,” an ti a, Kungawrhi chu an la bo ta daih a, an piah a Phaipheng bulah an luh pui ta daih mai a ni. Phawthira a rawn harh chuan Kungawrhi chu Khuavang hoin an la a ni tih a hriat chuan a thin-rim hle mai a, Hrangchala chu an kalna chin a zawt a, Hrangchala’n an luh puina a han sawi chuan an han en a, leihnuai luhna a lo awm a, leihnuaiah chuan khuavang ho chuan khua an nei a ni tih an hria a, an lût ve ta a ni. Phawthira chuan Khuavang ho hnênah chuan Kungawrhi pe lêt turin an ti a, an phal loh avângin a samkhuih te, diar te, dawhkilhte chu a thlâk a, an khua chu a thler thlerin a min hum hum mai a, a tâwpah chuan kungawrhi chu an pe let leh ta a ni. Kungawrhi an pêk let hnuah chuan khuavang khua chu chhuahsan tumin kawihruiah Kungawrhi leh Hrangchala chu an lawn hmasa a, Phawthira a lâwn ve dawn chuan Hrangchala kawihrui chu a sat chat ta daih a, Phawthira chu lawn ve thei loin a awm phah ta a ni. Hrangchala leh Kungawrhi chauh chu khuaah hawin an in nei ta a ni. Phawthira chuan a haw ve theih nan tiin kawi chu a chîng leh ta a, kum tam tak a haw theih nan a nghak a ni. Khuavang Khuaah chuan Nupui neiin fa hial a nei a, a kawi chîn a lo Mizo puitling tâkah chuan khuavang khua chu chhuahsanin a haw ve ta a ni. Khuavang sawi dan dang: Kungawrhi thawnthua Khuavang te bak pawh hi Mizo pi leh pu ten khuavang sawi an nei ngei a. Chu chu khuavang Pathian, mihring te chhinchhiaha malsâwmna thlen theitu, venga awmpui thintu, dam reina pea chawplehchilha mihring te malsawmna pe thei a ni a. thasiama khan khuavang a zawl a, Khuavang chuan malsâwmin dam reina an pe a, mahse, a damrei lutuk chuan thangthar zêlte nun chu a ning hial a nih kha. Liandova te unau thawnthuah Khuavang pitarin mal a sawm thu kan hmu a, lo zau zim te nei chungin buh tam tak an thar thu kan hria. Khuavang leh mihringte hian inzawmna tam tak kan nei a. Rev. Dr. Zairema chuan, Bible lehlin lai hian ‘GOD’ tih hi engtia lehlin tur nge? tih an ngaihtuah a, Pathian tih leh Khuavang tih thuah nasa taka an inhnial tih thu a sawi. (Mizo mizia Pathian thu) A ni tak a, Mizo tawngah hian Khuavang chu malsawmtuah an ngaih thu kan hre thin. “A khuavang a tha,’ A khuavang a chhia” tihte, ‘Khuavang rikhamsa’ te kan ti a. ‘Khuavang kallai’ tih thute pawh kan nei. Heng thu atang mai pawh hian, Khuavang chu Pi Puten an dah chungnun zia kan hre thei awm e. “Khua’ mita hmuh theih loh thima awm anga biru tlat mai chu hmuh theih leh biak theihin a rawn inlar ta a, chu chu a zawltu chauhin chang a, chuvangin ‘Khuavang a nei’ an tia. ‘Khuavang nei’ tin an ko ta a ni. Mizo tawng chuan ‘Zawlnei’ ti a sawi a ni. A hriat thiam a nuam zawk awm e.
