LAL UPA IN
Lal Upa In hi Lal In bula awm a ni a, a kawt ah Leikapui an dawh thin. Kaiten atanga han luh chhoh chuan Luhka a lo awm a, chumi zawm chuan sumhmun, dap chhuat a awm leh a. Chhak lamah sum leh thingkhawnte an awm a, thlang lamah chuan Archhiar, Artuibawm leh Arbawm vel a awm bawk. Kawngkapui han hawna thlanglam kil chu Tuium hun hmun a ni a, chumi zawn chhaklam chiah chu Khumai a ni leh mai. Khumai-ah hian khum dah an awm a, buh dahna pate/zem dah an awm bawk. Chhaklam bang siin Tapchhak a awm a, chu chu mei chhemna a ni a, eirawngbawlna hmun ber leh chen tamna lai a ni. Tapchhak chu thing suihphekin an dawm kual a, chhah tawka lei chhun khah vuak bel tlat a ni. Chu thing suihphek dawh, thlanglam ami chu a hnuai kawrawng thei turin an suih a, chu chu Dawhthleng tih a ni, a hnuai chu chempui dahna ber a ni. Chhaklam tap sir kawmchar lam chiah chu Khumpui awmna a ni leh a, khumpui sir kawmchar lamah khumpui aia sei deuhin pindanna dah a ni a, chu chu Banglai tih a ni, hei hi Fei leh Silai te pawh an dah thinna a ni. Khumpui ban pakhat sut hrula mi chu Phulraw pum lian tak hman a ni a, hei hi a chang atanga inches 6 velah an rek kua a, chu chu Tuibur um dahna ber a ni. Hei hi ‘Tungchaw’ an ti. Khumpui lu lam chhuat leh tapchhak thlanglam chhuat chu ‘Chhuat thlang’ tih a ni leh a. Banglai leh kawmchar bang inkar chu ‘Banglai chhung’ tih a ni leh a, helai hi inchhungah chuan hmun thim lai ber a nih avangin naupangin an hlau hle thin. Chhuat hi rawpui dap chhuat a ni ber. Lal Upa In-ah hian tukverh leh kawmchar kawngkate a awm a, bahzàr erawh a awm ve lo.
