Lasi
Lasite hi sa chunga thuneitu, pasalthate kah tur khalh hawsak thintuah pi leh pute chuan an ngai a. Lasite hi zawl mi an ni a, pasalthate nen an inzawl ber thin. Lasite lalpa ber chu Lalchungnunga a ni a, Seipui khaw nula hmeltha Chawngtinleri nupuiah a nei a. A nupui Chawngtinleri’n a fahrinsak hmel atanga a lan dan chuan kel hmel ang tak ni turah pi leh pute chuan an ngai a ni. A kimchang zawkin: Lasi nulate chuan Pasaltha ramchhuakin diartial khim chunga lungpuia an han per kai thauh thauh an hmuh te hian an lo ngaizawng em em thin a. Ramhnuaia an che tla te hi hmuhnawm an tiin an thlir ru fo thin. Thenkhat phei chu an hnenah an inlar a, Pasalthate’n an lo ngaihzawn ve chuan sa zawng zawng chunga thuneitu an nih avangin sa an kah tir fo a. Lasite hian thiltihtheihna mak danglam tak tak an nei a. Chung zinga langsar ber chu Ramsa thunun theihna an neih hi a ni a. Heihi Mihringte nena aninzawmna pakhat a ni bawk. Ramsa zawng zawng chunga thuneitu an nih vangin, an zâwl pasaltha hnenah chuan sa kah tur awlsam takin an pe thin a. Chuvang chuan, pasaltha leh sa kap thei ngaisangtu hnam, Mizo mipa te tan chuan Lasi zâwl chu an duhthusam thil pakhat a ni reng thin a ni. Lasite hian an mahni hmutu ten hmeltha tak anga an hmuh theih nan mi aikaih theihna emaw thiltihtheihna an neih a rinawm viau bawk. Hetia inzawl thin Lasi nula leh Pasalthate inkar suih nghettu ber chu mipat-hmeichhiatna a ni a. An inkar chu a ng- Mizo hetin induh tawn viau thin mah se, khawvel hran ami an nih miau avangin kumkhuaa awmdun thei an ni lo va. Chuvang chuan Pasalthate’n nupui an neih hunah he an inzawmna hi a chat mai thin a. Mizo thawnthu tam zawkah pawh Lasi leh Mihring inneihna hmuh tur a vang hle a. Chawngtinleri leh Lasi lalpa Lalchungnunga te chauh hi kan hriat theih china Lasi leh Mihring inneih pawlhna thawnthu awmchhun a ni mai awm e. Mihringte’n nitina upat lam pana kan hmelte a chul hnu pawhin Lasite hi chuan an hmel ngai reng puin an nun an la hmang thei bik thin a, chungte pawh chu a ni mahna Mihring leh Lasi te kumkhuaa an awm dun theih loh chhan pakhat a ni.
