PUM
Pum hi thirdeng in bula awm a ni a, a chung chu mau phelphawka khup leh zangthal inkarthlaka dah a ni a, a bangte pawh mau phel leh thing tun phui thut a ni. A kianga in (thirdeng in) lampangah chuan vang lawiin kawngka a nei a, chu pawh chuan kawngkhar a nei hran chuang lem lo, a duh duh an lutin an chhuak mai thei a ni. A chhung chhaklam ko lam hnaihah chuan Pumthéi, thing mum foot khat diameter vel tur kawrawng pahnih a ding thiang a, chu pumthei chu azahna arfep vuah chuan han zap ila a mawng pawp atanga mautheia lakchhawn chuan pum-thuk chu a rawn chhem thaw a, thaw chak tak lo chhuak chu pum thuka meihawl rawn chhem vamtu a ni. Chu mei chu thir rawhlinna a ni ta a ni. Thuk bul dinglam chu Thirdeng thutna a ni a, a bulah chuan dolung te an awm a, vawkthleng chhunga tui awm a awm bawk. Chumi thlang chu dawhkan, thingpum khamphei a ni. Bang thlanglam chu mihring leng zet hian a phei zawng tluanin hawn a ni a, chu chuan kawngkhar a nei chuang lo.
Pum-ah hian hriamhrei an chher tirin, a bil te pawh an den hriamtir bawk a, tin, pa upa lam Thian mamawh an fuankhawm bawk Thin. Thirdengpa a kawm nawm vang ni lovin a kianga thuho an inthlahlel a ni. Sawi turin a daih thin loh avangin thu belhchian dawl mang lo te sawi mai mai ching a tam. Chuvangin Pum titi tih chu tawngkam pakhatah a lo chang ta a ni. An thu awih mang loh deuhte chu, “Chungte zawng Pum titi a nih lek dawn chu,” an ti thin. Pum titi leh Zukhawn changlo titi hi an inhnaih hle.
Puma hmanrua chhertir tur emaw, chher hriamtir tur emaw chuan meihawl an keng tur a ni a, anmahni hmanrua chher a nih chhung chuan Pum an zap tur a ni bawk. Thirdeng hian kal hmasak dan indawt thlapin a lo chhersak thin. Mahse hmeichhia thil chher tur keng an lo kal chuan, a indawt sawi lovin an chher hmasaktir thin. Pumah hmeichhia an lal a, tuikhurah mipa an lal tih kumkhua a ni.
Pum chu vantlang ta a nih avangin kawng hrang hrangah an hmang bawk. Khamkhuai an lakte hian, Khuaihnun la turin meia chhuan vak a ngai thin a, chutiang chhuan chu a liam vaih chuan a alh hluah mai thei a, chuvangin in pangngaiah chhuang lovin Pumah an chhuang thin. Tin, Pum chu kang mai thei lo tura a chung pawh mau, a bangte pawh thing leh maute a ni a, a hlauhawm dan a ziaawm deuh bawk a ni. Tin, mitthi ruang zawnin khua-ah chuan chawlhpui ngai sela, mitthi chhungkhat ina dah lovin ruang chu Pumah an khang thin a ni. Hmanlai chuan Sarthi hi an ngai runthlak hle a, ramhnuai atanga an zawn haw hian khum-ah dah lovin chhuat-ah an zalh a, a zan a zanin an phum thin a ni. Hetiang hi a nih avangin, Pum chu mitthi thla-te pawh awm duh deuha ngaih a ni a, zanah chuan naupangin an nel vak lo.
