Sanu
Pi leh pute chuan nitin hian mi 100 an thih tlin ziah a ngai niin an ring a, a tlin loh aichuan a tihtlin nan Sanu hian dam tha lai reng pawh an nunna an laksak mai thin, chutianga mi an thih chuan zachhamlak tiin an sawi mai thin. An thlarau lak tur thlira kut zungchala an kawh leh an bana an kaih te chu damchhuak an awm ngai lo a ni an tih chu! A kimchang zawkin: Sanu hi Pawla nupui a ni a, Mizo pi pute rin dan chuan ni tin hian mi za thi tling ngei ngei turah an ngai a. Mi za an thi tling lo a nih chuan Sanu hian mi nung khawvelah rawn kalin mihring dam tha pangngai, natna sawi tur engmah nei lem lo te pawh chu a va tihlum a, an thlarau chu mi za tlin nan chuan a lak sak mai thin an ti. Sanu hi nu lian tak a ni a, bawmrang lian tak mihring leng zan tur zo taka phur chunga chak tak taka kal kual thin niin an ring a. A pasalin sai tur a neih loh chang phei chuan Sanu hian a khawngaih thei em em a, a pasal hlim nan tiin a pasal in-a a sai tur chu minung khuaa kalin a ti hlum ta thin niin an sawi bawk a ni. Chutiang reng renga hmanhlel a nih avang chuan hman ata a puan tah ve chhun pawh kutzungpui bawk lek a la tah e an tih chu! A pasal sai tur a lo kawk va thin avangin Sanu kawh hi thil hlauhawm tak a tling hial awm asin.
