THIRDÊNG IN
Thirdeng hi khawchhungah pahnih pathumte pawh an awm thei, chung zingah chuan Lal Thirdeng bik an awm a, chu chu khawchhung mi zahawm a tling ve phak a ni. Sa an kah emaw, awh emawin Thirdeng sa, a zangthlur ti tha an pe thin a, tun hnu British rorel hunah chuan buh, in tinin an bituk ang tawk an pe theuh thin.
Thirdeng in chuan Leikapui a nei lova, luhka dawt chu sumhmun a ni mai a, chhak lamah chuan sum leh thingkhawnte an awm a, thlang lamah chuan Archhiar, Arbawm leh Artuibawm vel a awm bawk a. Kawngkapui han hawna thlanglam kil chu Tuium hun hmun a ni a, chumi zawn chiah chu Khumai a ni leh mai. Khumai ah hian khum dah an awm a, buh dahna pate/zem dah an awm bawk. Tapchhak chu dawhthleng leh dawhchho in an dawm kual a, Tap sir kawmchar lam chiah chu Khumpui awmna a ni. Khumpui lu lam chhuat leh tapchhak thlanglam chhuat chu ‘Chhuat thlang’ tih a ni leh a, Banglai leh kawmchar bang inkar chu ‘Banglai chhung’ tih a ni. Banglai chu khumpui sir kawmchar lama khumpui aia sei deuhva pindanna an siam hi a ni.
