ZAWLBÛK
Lal In atanga hla lo tea In pian danglam tak mai zang kul khuau mai, a bungbu zawnga sak lian bik lurh mai chu Zawlbuk a ni. Zawlbuk hi tlangval zawng zawng te zanriah eikhama nula rim hmaa an chhuahkhawmna hmun leh riahkhawmna a ni. A hunlai chuan tlangval Zawlbuka riak rual chuan mahni ina riah chu tlawmthlak leh pa lo an ti a, nupui neite pawh fa pahnih neih thleng thlenga Zawlbuka riak an awm chawk.
Lei atanga Zawlbuk lut tura ke han pena rah hmasak ber chu thing ehphel, a tung zawnga kham a ni, chu chu ‘Kaiten’ an ti. Chumi Kaiten dawt chiah chu thing pum pil kheh, a kham zawnga khamphui thut a ni, chu chu Leika/Luhka a ni. Sumhmun a awm hran chuang vak lova, thingpum phah phui mai tho vek a ni.
AWKPAKAWNGKA : Hei hi a pawn bera bang awm chu a ni a. Mihring awm thleng vela sang atanga chunglam chu dap a pin phui vek a ni. Luh dawn pawha kun a ngai a, ‘Awkpakawngka’ tih hming pu tu a ni.
THINGNAWI BAWM : Luhka sir lehlam bang hrulah ‘Khuahhrawlh’ in thingtuaia hung a ni. Hei hi ‘Thingnawi bawm’ tih a ni.
BAWHBEL : Luhka/Sumhmun leh inchhung daidanna a ni, thing lian ngil tha tak, a in vang lam tlin chhuaka sei chu, kawng thleng vela sangah kham a ni a; Bawhbel neih lenah hian khaw dangte an elna a nih \hin avangin, thinglian, mum tha leh ngil si, a khuaa zawn hut hut thama lian an hmang thin. Inchhunga luh dawnin bawh liam a ngai a, a tliang hliau thin.
UITUM : Inchhung luha chhuat rah tantirh tap thlen hma chhuat chu a ni a. Rikrum thila tawntirh a nih avangin, tlangval tlawmngaih tumte mutna ber a ni. A sir bang hrulah tuium (Dan um) leh silaite an tung khawm thin.
TAP/MEI CHHEMNA : Tap hi mei chhem hluah hluahna a nih avangin a chhah bik a ngai a, lei atanga chhunkhahin an chhep thin. Hlam hnih bial laia liante a ni thin. Khanchhuk chungah ‘Meisi dal’ dap tahpharh an zar a, a chungah rikrum thulha chuh vat atan ‘Meichher’ tel an dah lawk teuh thin a ni.
Tap chu a laia awm a nih avangin a sir vel zawng zawng chhuatlai chu, chenna leh kawng hrang hranga infiamna/inbuanna hmun a ni.
BAHZAR : Chhuatlai/Buanzawl piah kawmchar lamah a chhuat chu a in vanglam tluanin hniak tung vela tihsan bik a ni a, pawnlam hawia mutna tawka zau a ni thin.
AWKPAKA : Bahzar kawmchar bang hmai zawng leh a sir lam bang, chhuata thuta zakchep vela sangah chhunglamah a bang pin a ni a, chumi a chin chunglam te chu ban pawnlamah pin a ni ve thung a, a chhunglam bang aia sang hretah an ping a, a inzawmna lai chu patling leng laiin a awng zui a, chu chu ‘Awkpaka’ an tih chu a ni.
PUANTHUAH DAHNA : Bahzar atanga pawnlam bang chhak leh thlangte chu dap malkalhin bangrel sang zawk thlengin an thuah a, chulai hmun chu puanthuah dah nan an hmang thin.
