March 14, 2023 tlai lam dar 3:30 PM khan North East Zone Cultural Centre, Ministry of Culture, Gov’t of India leh Art & Culture Department, Mizoram tangkawpin an buatsaih UMANG Festival (Vohbikte Kut) chu hlawhtling taka neih zawh a ni ta a,  he festival-ah hian mi thiambik ten participants te thiam thil chi hrang hrang an zirtir thin a, Festival khar ni-ah hian an  thil siam te an entir a ni.

12th Umang Festival kharna inkhawm hi Pu F. Lalthanmawia,S.R.O, TRI, Programme Director ni bawk chuan a kaihruai a, Pi Carol VLMS Dawngkimi, Director Art & Culture Department chu khuallian a ni. Pi H. Lalbiakdiki, Spl. Educator & Resource Person chuan report a pe. Umang Festival-a tel naupangten Special Item tha tak an nei a, zirlai nu leh pa te hnen atangin thusawi tha tak tak ngaihthlak a ni bawk a, Pi K.C. Runremsangi'n zaiin Festival hmangtute a awi bawk a ni.

Gilead Institute of Learning & Research, Bawngkawn Brigade Road-a Umang Festival kharna inkhawm neihah hian Khuallian Pi Carol VLMS Dawngkimi chuan thu sawiin, "an zir thiamna te chu an thiante leh a nau te hnen a hlanchhawng zel turin a chah a, Umang Festival-a tel Vohbik zirtirtute hnenah lawmthu a sawi a, an hnathawh chu hna ropui tak, missionary nihna ropui tak a nih thu a sawi a, thu a sawi zawhin Festival hmangtuten Basket an siam chu School tel te hnenah Souvenir atan a hlan theuh a ni.

12th Umang Festival-ah hian School pali - Gilead Institute of Learning & Research, Ephatha Special School, Kulikawn, Redeem Garden, Durtlang Leitan leh Shining Star, Republic Veng zirlai leh zirtirtu mi 43 lai an tel thei a ni.