UMANG Festival (Vohbikte Kut) North East Zone Cultural centre (NEZCC) Dimapur, Ministry of Culture, Gov’t of India leh Art & Culture Department, Mizoram tangkawpin 19 - 21 September, 2017 chhunga a buatsaih hi Mizorama tum 8 huaihawtna a ni a. Pi Zaii Hall, Synod Conference Centre, Aizawl Mizoram ah neih a ni. Kum 2009, 2010, 2011, 2012, 2014 leh 2016 (March & August) ah te khan hlawhtling taka neih alo ni tawh a.

Umang Festival hi NEZCC in India Hmarchhak State hrang hranga neih tur a ruahman a ni a. Tun tumah hian Mizoram chhung ami chauh tel tura buatsaih a ni. Umang Festival ah hian mi thiambik ten participants te thiam thil chi hrang hrang an zirtir thin a. Festival khar ni ah an thil siam te an entir thin a ni. Tun tumah hian Naute lem siam (Doll making - Modern & Indigenous) NEZCC lam atanga an rawn thlan chu zir pui a ni.

8th Umang Festival hi Ni 21, september 2017 Chawhnu dar 1:00 ah a kharna inkhawm neih a ni. Pi Thanhliri, Secretary, Art & Culture Department chuan inkhawm a kaihruai a, Pu F. lalthanmawia, Archivist & Camp Director chuan camp report a pe. Kharna inknhawm ah hian Pu R. Romawia, Hon’ble Minister, Art & Culture Department chu khuallian niin, nu leh pa thenkhat mahni fate ngei enkawl tha peih lo leh hlamchhiah an awm laia naupang enkawl ngai bikte enkawltu pawl leh mithiam tak tak enkawltu leh zirtirtu an awm chu vanneihthlak leh lawmawm a tih thu sawiin khuallian Pu R Romawia chuan an thiamthil hlu leh nalh tak tak vawiinah phochhuah a ni te, an aw mawi leh lam hmuhnawm takte vawiinah hmuh leh ngaihthlak theih a ni chu lawmawm a tih thu a sawi .

Tun hma chuan Rualbanzolo te chu nuihzat leh biak nawmnah an hlawh hle, tunah erawh chuan duat leh uluk taka enkawl leh zirtir an ni tawh in,mi thiam tak tak ten an kaihruai tawh a, a lawmawm tak zet a ni tiin Art & Culture Minister chuan mihring te hi rilru leh taksa, pian hmang te in ang veklo mah ila, Pathian in a duh taka a siam te zinga mi kan ni vek tih hriat a tul thu a sawi a. Pianphunga rualbanlote aiin rilru lama rualban lo kan pung chho ta tlat mai hi a pawiin inven a pawimawh thu Pu R Romawia chuan sawiin pumrua pangai tak si, hnathawh tum tlat lo, kutdawh rilru put tlat te hi a hrisel lova, rilru hi tih piansual loh tur ani a, mi pangai tak tak inenkawlna Home hrang hranga awm a ngai te hi a vanduaithlak a, rilru hrisel put tum tlat tur ani a ti bawk. Pu R Hmingthanzuala, Director, Art & Culture Department chuan kalkhawmte hnenah lawmthu a sawi a. Vohbik naupang ten Special Item hrang hrang neia entir in zaithiam zaite ngaihthlak a ni.