Vawiin August 14, 2023 khan Azadi Ka Amrit Mahotsav (AKAM) Independence Day Concert cum IMFA Graduation Day 2023 neih a ni a; chawhnu dar 1:30 atang khan AKAM Independence Concert hi Vanapa Hall-ah neih tan a ni a. Pi Carol VLMS Dawngkimi, Director, Art & Culture Department chu  khuallian a ni. 

Pu K. Lalruala, Deputy Director, Art & Culture Department chuan khuh hawnna thu tawi a sawi a, "vawiin India Zalenna champha puala a lawmna hun kan hman mek lai hian India Hmarchhaka kan unau tlang mi harsatna nasa tak tawkte i hrereng ang u," a ti. Khuallian Pi Carol VLMS Dawngkimi chuan thusawiin - August 15 a lo thlen hian India in harsatna leh dodal na nasa tak karah leh thisen tam tak sengin British sorkar lak atangin zalenna a sual chhuak a ni tih min hriat chhuah tir se. He kan ram, India hi ram tha leh zual zawk ni tura siam hi thangthar zawk te hian kan mawhphurhna a ni tih I hre thar leh theuh ang u, a ti a. Khuallian hian, Zalenna hlu tak kan neih theih nana huaisen taka lo beitute chungah vawiin hian zahna chibai hlan ang u. He zalenna min pek rual hian India ram hi zalenna hnuai-ah hnam tin te; inrem leh inngeih taka an khawsak ho theihna turin mawhphurhna nasa tak min hlan tel nghal a ni tih pawh kan hriat tlan a tul a, keini thalai te hian India ram inpumkhatna tur hian theihtawp kan chhuah a ngai tak meuh meuh a ni. Kan state thenawm lawk ah, vanduaithlak takin hnam leh hnam inkarah buaina nasa tak a chhuak mek a ni tih kan hre theuh awm e. He thil thleng hi a vanduaithlak in pawi kan ti takzet zet a. Kan ram zalenna tur leh a chhunga hnam hrang hrang-te inpumkhatna atana theihtawp lo chhuah tawh tu Pu Gandhi-te, Pu Nehru-te leh Pu Vallabhbhai Patel te khan hmu in hre ve pha se chuan pawi an ti ve ngawt in ka ring a ni. He buaina hi a lo reh thuai theihna turin kan zavai in India zalenna vawi 76-na lawmna nipahfawm in Pathian hnenah theihtawp in I tawngtai theuh ang u, a ti.

Kumin zalenna champha lawmna atan hian Sorkar laipui chuan thupui ‘Meri Mati Mera Desh’ tih thupui a rawn thlang a, chu chu Duhlian tawng chuan ‘Kan ram hi kan ta a ni’ tiin a lehlin theih awm e. Hemi piah lamah hian kum kalta a kan lo hman tawh ‘Har Ghar Tiranga’ – (In tin ah hnam puanzar) tih pawh kha rawn thar thawh leh niin; Art & Culture department chuan department dangte phungbawm a sawm in hlawhtling takin kan hmang mek bawk a ni.

AKAM Independence Concert - 2023 -ah hian Institute of Music & Fine Arts (IMFA) atanga Music zir chhuak tawh ram pum huapa hnu hma tha tak tak nei zui ten zai leh lamin mipui an awi a -  PI Rebecca Saimawii, Pu C.  Lalzarmawia, Pu Lalawmpuia, Pu K. Hminga, Pu Victor-a, Pi Lalrampari, Pu Israel Labiakrema, Agnes VL Kawltiri te bakah IMFA Band ten mipuiin  an awi a. College leh School hrang hrang atangin Band tha tak an zai bawk a, IMFA Instructor ten music leh zaiin mipui an awi reng bawk a, Art & Culture Department zaipawl - Anacrusis an zawi bawk a, zai leh rimawi karlakah hian Mizo hnamlam mawi taka entir a ni bawk.

AKAM Independence Day Concert leh IMFA Graduation Day 2023 hi Host MS Ralte leh Muansangi Varte ten hneh takin an kaihruai.