Vawiin December 11, 2023 khan Pu C. Lalsawivunga,  Minister, Art & Culture Department chuan a pisa thar a luah lut a, kohhran leh khawtlang hruaitu engemawzatin an tawiawm a, an enkawl Department tangin Officer engemaw zatin an tawiawm bawk a. Art & Culture Department atangin Pi Carol VLMS Dawngkimi, Director leh Pu Vanlalhuma Singson, Archaeologist ten an tel pui a ni.

Art & Culture Department Minister Office luah leh hlanna inkhawm hi Pastor John Raldosanga, Bethlehem Venglai Kohhran-in kaihruaiin Pathian hnena lawmthu sawina hun a hmang. Minister Pu C. Lalsawivunga chuan, 'Pathian leh mipuite duhsakna zarah thlan tlina a awm leh Cabinet Minister dinhmun pawimawh tak a luah chu lawmthu a sawi a. A mawhphurhnate chu Pathian chakna ringin tha taka hlen zel a tum thu a sawi'. Minister chuan, 'ram rorelnaah Pathian ram tundin chu an sorkar thiltum pawimawh berte zinga mi a ni' a ti. A enkawl tur Department palite pawh an hnathawh chu mipui leh kuthnathawktute thleng phak ni ngei tura a duhthu a sawi bawk.

Pu C. Lalsawivunga hian Art & Culture Department, Local Administration Department, District Council & Minority Affairs leh Animal Husbandry & Veterinary Department te a enkawl dawn a. Minister pisa thar hi MINECO old building first floor - Room no. 001 & 002 - ah a awm a ni.