Vawiin June 8, 2023 tlai dar 3:30 khan Director, Art & Culture Department Office Chamber - ah Art & Culture Department Zaipawl - 'ANACRUSIS' - ten Music Video an siam 'Chhimpheiduai' chu Pi Carol VLMS Dawngkimi, Director-in a tlangzarh.

Art & Culture Department Zaipawl Music Video tlangzarh inkhawm hi Pu F. Lalthanmawia, SRO, TRI & Director, A&C Zaipawl in a kaihruai a. Pu Lalpiangliana, Conductor, A&C Dept Zaipawl chuan report a pe in Chhimpheiduai Music Video siam a nih chhan a sawi a, he music video-ah hian tunlai rimawi hmanrua engmah a tel loh thu te, hmanlaia kan pipute rimawi hmanrua chauh hman a nih thu te  sawiin, 'min thlahtu kan pi leh pute rimawi leh zai te ngaihlut zel a lo nih theihnan te, chawi nung a, vawn him zel a lo nih theihnan te he music video hi siam a nih thu a sawi a ni.

Pi Carol VLMS Dawngkimi, Director, Art & Culture Department chuan thusawiin, he music video tha leh hlu tak hi kan hnam zai leh rimawi te a lo nung zel theihnana hmanrua pawimawh tak a nih thu a sawi a, Art & Culture Department Zaipawl - Anacrusis -te Music Video - Chhimpheiduai' chu a tlangzarh nghal nghal a ni.

Art & Culture Department Zaipawl-ah hian Pu F. Lalthanmawia, SRO, TRI chu Director niin Conductor chu Pu Lalpiangliana a ni a, zaipawl member 16 an awm a ni. Art & Culture Department tirh a Mizoram aiawhin Sangeet Natak Akademi-ah te leh hmun hrang hrangah te an lo zai tawh a. Mizoram hminga an zainaah hian Stage Name an neih a tul thin avangin an hmingah 'Anacrusis' tih a ni a, a awmzia chu 'Rimawi hmahruai' tihna a ni.

A hnuaia link tarlan Art & Culture Department Youtube Chanel - ah hian en theihin a awm a ni

https://www.youtube.com/watch?v=yWrMKNORgJg