Vawiin 28th March, 2025 chawhma dar 10:30 khan Maite Community Hall-ah Tuivawl Group YMA Inkhawmpui Vawi 2-na Vantlang Inkhawm hun hman a ni a, he Inkhawmah hian Pu C. Lalsawivunga, Hon'ble Minister, Art & Culture Department chu Khuallian a ni.
Inkhawm hi Tv. Lalbiakninga, Treasurer, TGYMA-in a kaihruai a. Khuallian Pu C.Lalsawivunga chuan Group YMA huam chhunga Branch 4 - Mualpheng, Lenchim, Tawizo leh Maite atanga YMA member kalkhawm te chu mipat hmeichhiatna leh ruihhlo laka fihlim tur te, Kristian chhungkaw tha tak din a, Pathian tih turin a ngen a, Pathian leh nu leh pa thuawih tura chahin duhsakna a hlan bawk.
He inkhawmah hian an member chatuan ram pan mi 8 te sunna hun hmangin Lenchim Branch YMA Zaipawlin sunna hla an rem a. Group YMA hruaitu hrang hrang ten thusawi an sawi bakah Nl. Vanlalfeli Sailo, GEC in Thuthlung sawirual a kaihruai a; Lenchim Branch, Tawizo Branch leh Taitesena Section te atangin Special Item ngaihthlak a ni a. Tuivawl Group YMA huam chhungah hian member 1604 an awm mek bawk.
Minister hi Art & Culture Department atangin Pu F. Lalthanmawia, Deputy Director chuan a tawiawm a ni.