Art & Culture Department leh North East Zone Cultural Centre (NEZCC), Dimapur - Ministry of Culture, Govt of India tangkawpin an buatsaih Border Area Meet & Bharat Ko Janno - A Chain Yatra Programme chu ni 10th & 11th December, 2025 hian hlawhtling tak a buatsaih a ni. 

Ni 10th December-ah hian Bawktlang khuaah neih hmasak niin Pu H Lalduata, Addt SP, Serchhip chu Khuallian niin hnam inpumkhatna atan Border Area Meet leh Bharat Ko Janno Program a hlutawm dan te sawi langin Organiser -  Art & Culture Department leh NEZCC chungah lawmthu a sawi a ni.

A nihnihna hi Ni 11 December-ah Supply Tlang, North Vanlaiphai-ah hman niin  Dr Peter Malsawmtluanga SDO (Civil) N. Vanlaiphai chu Khuallian a ni. Khuallian hian Art & Culture Department leh NEZCC Dimapur Ministry of Culture ten cultural programme hlawhtling taka an buatsaih thei lawmawm a tih thu sawi a, state hrang hrang leh YMA branch hrang hrang rawn tel te hnam ziarang humhalh a, hmasawn zawnga hmalam pen zel turin a chah a, cultural artiste te fuihin hetiang programme-ah hian state danga kan unaute nen kan hnam lam leh hun pawimawh bik hnam hrang hrangin kan hman thin te in hrilh tawnna hun atana hmang tangkai turin a chah. 

Pu F Lalthanmawia, Jt Director, Art & Culture Department-in report pe in Border Area Meet leh Bharat Ko Janno programme hman a nih chhan te sawiin Bharat Ko Janno hi Discover Northeast hming pu in kum 2006 khan hman tan a lo ni tawh a,  tunah hian Bharat Ko Janno tih a lo ni ta ni, Mizoram chhung district hrang hrangah hetiang programme hi Art and Culture Department leh NEZCC ten tangkawpin vawi 8 an huaihawt na a ni, ram leh hnam inpumkhatna atan programme pawimawh tak a nih thu a sawi a. 

Mizoram pawn atangin Assam, Madhya Pradesh, Manipur leh Nagaland atangin cultural artiste member 46 rawn tel in Bawktlang leh North Vanlaiphai atangin YMA Branch 5 leh Joint YMA North Vanlaiphai ten kan Mizo lam hrang hrang mipui kalkhawm te an entir bawk a ni.