Vawiin September 14, 2023 khan Art & Culture Department leh Bungtlang Educational Service Association (BESA) buatsaih Cultural Meet 2023 chu Bungtlang High School Ground-ah neih tan a ni a, Pu K. Lalruala, Deputy Director, Art & Culture Department chuan khuallian niin a hman pui. Cultural Meet hi naktuk September 15, 2023 hian chhunzawm a ni ang. 

Cultural Meet hi Pu V. Lalhmangaihzuala, President, BESA chuan a kaihruai a, Rev. CK Lalchhanhima'n hunserh a hmang a. Khuallian Pu K. Lalruala chuan thusawiin, 'Bungtlang khua-a mizo hnam ziarang te chawinung zel tura Bungtlang Educational Service (BESA) te hmalakna hi a fakawm em em a, hnam ziarang chawinung tura VC member te, khawtlang upa te Pastor te leh khaw mipui te in rawn thawk chhuak hi a ropui tak zet a ni,' a ti a, Khuallian hian sawi chhunzawmin Cultural Meet hmangtu thalaite chu rinawmna, dikna leh takna te nunpui turin a chah a, kan ram tana hna tha thawk thei tura tan la turin a sawm a, Cultural Meet 2023 chu a hawng nghal a ni.

Bungtlang Educational Service Association (BESA)-ah hian Bungtlang khuaa School 10 te an tel a, thalaite leh zirlai ten mizo hnam ziarang an hriat a, mizo hnalam leh zai te an thiam theihna turin hma an la thin a, Kum 2019 atang khan Cultural Meet hi an buatsaih tan a ni.

Bungtlang Cultural Meet 2023 ni khatna September 14. 2023-ah hian Bungtlang khua-a YMA Branch hrang hrang te leh School hrang hrang ten Mizo hnam lam chi hrang hrang, hnam zai te leh Costume Parade te an entir a, naktukah hian Item tam zawk neiin an chhunzawm ang.