Pahhunga University College, Mizo Department leh Art & Culture Department, Govt. of Mizoram tangkawpin ‘Certificate Course in Mizo Cultural Studies and Performing Arts’ an kalpui tur chu October 16, 2017 khan Art & Culture Minister, Pu _ chuan a hawng.
Pachhunga University College Seminar Hall-a Course hawnna inkhawm hi Course coordinator Dr.Zoramdinthara chuan a kaihruai a, Asst. Coordinator H. Laldinmawia chuan course kalphung tur report tlangpui a pe thung. Hemi hnu hian Art & Culture Department leh Pachhunga University College te chuan ‘Thawhhona Thuthlung’ (Memorandum of Understanding) an ziak a, PU College aiawhin Principal Dr.Tawnenga’na ziak a, Art & Culture Department aiawhin Director Pu R.Hmingthanzuala chuan a ziak a, Mizo Department aiawhin Head of Department, Dr. Lalzama chuan a ziak thung a ni.
Course hawnna-ah hian PU College Principal chuan, ‘Mizote hian kan Mizona kan vawnnun zel a ngai a, ram leh hnam hmangaihna (nationalism) hi a lera thuai lovin, a bulthum atangin tan chhoh kan tum. Khawvel Institution dangte laka kan danglamna leh kan special theihna chu kan hnam nun kan chawi lar leh kan zirchianna hi a ni’ a ti bawk. Art & Culture Department aiawhin Pu R.Hmingthanzuala chuan thu a sawi a, Art & Culture Minister Pu _ chuan he course thar hi a hawng a ni.
He Certificate Course in Mizo Cultural Studies and Performing Arts hi part A leh B-ah then a ni a, Part-A ah hian Culture lam an zir ang a, Part B-ah hian performing arts lam an zir thung dawn a. A zir hun chhung hi thla ruk niin, theory paper pali (4) a awm a, practical pahnih (2) a awm bawk. Theory paper hi Pachhunga University College Mizo Department Faculty ten an zirtir ang a, practical hi Art & Culture Department-a Instructor ten an zirtir thung dawn a ni.
Course zir tur hian seat 40 siama ni a, University Grants Commission (UGC) in Core based Credit System (CBCS) kalphung a duan angin Credit System leh Grade Point System veka kalpui tur niin he course-a zirchhuak te hi Art & Culture Department pawhin a tul angin a hmang tangkai thei dawn a ni.
