Vauthla ni 5, 2021 khan Chapchar Kut 2021 chu COVID19 hrileng avangin kumdang anga lawm theih ni lovin, mipui him tlan nan kumin Chapchar Kut lawmna hi TV ah leh Youtube-ah live-a pechhuak in virtual a lawm a ni a. Covid-19 SOP zawm chungin Vanapa Hall-ah mi sawm bik tlem te in hun an hmang a. Chief Minister Pu Zoramthanga chu Kut Pa niin, Art & Culture Minister Pu R. Lalziriana chu Kut Thlengtu a ni.


Kut Pa Pu Zoramthanga chuan Chapchar Kut chu zohnahthlak khawvel hmun hrang hranga awmte min pawt hnaitu, hnam inpumkhatna atana rahbi hmasa a nih thu a sawi a. Kumin Chapchar Kut thupui, Zonun Zemawi: Thuawihna chu tun hun a kan mamawh tak nia a hriat thu a sawi a. Covid-19 natna in khawvel a nghawng in, sawkar lian ram changkang zawk te chuan sum, doctor leh medical facility nei tha zawk an nih avangin an do hneh zawk tura rin ni mahse hri vei leh nunna chan tamna zawk an nih thu sawiin, Mizoram chu chung ram changkang zawkte aia chan chhia a ngaih si India ram a dinhmun ziaawm ber kan ni a ti a.


Chief Minister chuan Myanmar a kan unaute pawhin tunah sipai rorelna avangin harsatna an tawh thu avanga pawi a tih thu sawiin, ei tura harsatna tawkte tan sawrkar pawhin sum a sanction thu te a sawi a ni.


Kumin hrileng avangin kan duh angin he kut pawimah tak hi lawm theilo mah ila nakumah chuan zangkhai zawka kan hman theih nan Zofate tawngtai na nen thuawih takin zonun zemawi chhawm nun zel turin Chief Minister chuan mipui a sawm a ni.


Kut Thlengtu Pu R. Lalzirliana chuan mipui lawmna thu sawiin Covid19 hrileng karah a him chin ang zela lawmin, tun hapta chhungah pawh office kal te, sumdawngte, taxi/bus driver leh adangte pawhin hnam thuam a inthuam a an lo inbuatsiah dan te a sawi a. Chapchar Kut tobul leh lawm a nih chhoh zel dan sawifiahin, he kut hi pi leh pu te Zonun zemawi kan chhawm nun zel theihna a nih thu a sawi a. Khaihchhuah ngai te khaichhuah a, puih ngaite puih chu kan tih tur a nih thu sawiin, kuminah hian Myanmar a kan unaute pawh kan hre reng a ni, a ti a. Kut Thlengtu chuan thangtharah tunlai thiamna leh changkanna lam zirtir chauh duhtawk lovin, ram mipui nun hmasawnna tur chuan kan pi leh pu te zonun zemawi kan inzirtir tel a tul a ni a ti a. Intodelh tumna nun neih pawimawh a tih thu a sawi bawk.


Vawiin Chapchar Kut hawnna inkhawmah Live programme ah hian CYMA President Pu Vanlalruata pawhin thu sawi bawkin, Art & Culture Department Director Pu R. Hmingthanzuala chuan lawmthu a sawi a. Virtual (pre recorded) programme in  chhunzawm a ni. 


Chapchar Kut 2021 lawmna thlalak (Photo) te hi a hnuaia link dah-ah hian en theih leh download theihin a awm e.

https://drive.google.com/drive/folders/1uWXA-qkUy1Eq0Aqx6CZ28oN5I9QK8AJW?usp=sharing


Chapchar Kut lawmna Video hi a hnuaia Youtube Link dahah hian en theih leh download theihin a awm e.

https://youtu.be/kZU1gswR2VI


https://youtu.be/pLfBK-XY0ag