March 3, 2023 khan zofate Kut ropui ber Chapchar Kût chu ropui taka hman a ni a. Chapchar Kut lawmna pui ber Aizawl Lammual-a neihah chuan Chief Minister Pu Zoramthanga chu Kut Pa a ni a, Mizoram Legislative Assembly Speaker Pu Lalrinliana Sailo chu Kut Thlengtu a ni.
Chapchar Kût 2023 thupui tan hian 'Zofate Inpumkhatna' tih chu hman a ni a. Kut Pa Pu Zoramthanga chuan Covid19 hripui leng avanga kum hnih chhung chu pangngai taka kût kan hman theih loh hnuah ropui taka kan Kut leh thei chu lawmawm a tih thu a sawi a, Chapchar Kût chu Mizoramah G20 hnuaia meeting pakhat B20 meeting Aizawl a nghah nen a hun innang chiahin, ram hrang hrang atanga meeting a tel tura lo kalte'n Mizo kutpui an rawn chhim ve theih phah chu lawmawm a tih thu a sawi bawk. Chief Minister chuan he kut kan lawmnaah hian kan thenawm ram Myanmar ami te India ram hmun hrang hrang, Bangladesh leh hmun dang danga kan unau te tel ve tura sawmin, sawrkar pawh theihtawpin a inbuatsaih thu a sawi a. Thenawm ram buai avanga hmun harsa zawka awm te pawh kut min hmanpui tura sawm niin min tel pui thei tura a rin thu te, kut thupui angin Zofate Mizoram chhung leh pawn, khawvel hmun tin a awm te nen min suihkhawmtu, kan inpumkhatna lo ni zel se tiin Kut Pa chuan harsatna karah inpumkhatna chhawm nung zel turin Zofate a sawm a ni. Kut thlengtu Speaker Pu Lalrinliana Sailo chuan Kut hmang tura kalkhawmte lawmna thu sawiin, hnam ziarang chawilar zel thiam a, pi pute lo nun dan leh tih thin danah a thalo lai paih a, a tha lai chhawmnung zel tur kan nih thu a sawi a. Kût hman danah pawh hlim taka lawmin, ruihhlo tello a inngeih tlang tak zela hmang turin kalkhawmte a sawm a ni.
CYMA President Pu R. Lalngheta pawhin thu tawi sawiin, hnam lam leh zai hrang hrang bakah rimawi tum leh Mizo infiamna te entir a ni a. Chawhma hun hi Art & Culture Dept Director Pi Carol VLMS Dawngkimi chuan lawmthu sawiin a khar a, a hun hnihnaah zai leh lam hrang hrang entir a ni bawk.
Chapchar Kut Pual hian Vanapa Hall ah I&PR department hmalakna in Photography leh Painting Exhibition buatsaih a ni a, Pu Lalruatkima, Minister, DIPR chuan a hawng a, tin, Aijal Club Park ah Flower Show buatsaih a ni bawk. Lammual ah hian ei leh in tur leh thuamhnaw leh adangte zawrhna stall engemawzat hawn niin Art & Culture Department chuan Mizo Puan G.I te an phochhuak bawk a ni.. MZI buatsaih Chapchar Rimawi Kut, 2023 chu Art and Culture Minister Pu R. Lalzirliana hovin Sipai Lammual-ah neih chhunzawm a ni bawk a, he hunah hian Art huang chhunga Padma Shri dawngtu Pi K.C Runremsangi hnenah chawimawina hlan a ni.
Chapchar Kut 2023 pualin Zokhua, Falkawnah Zonun Kutpui - Hmanlaia Mizotem nundan tlangpui entirna buatsaih a ni a, mipuiin an hlut hle. Zonun Kutpui hawnna hi March 1, 2023 chawhma dar 11:00 khan neih a niin Pu R. Lalzirliana, Hon’ble Minister, Art & Culture Department chuan a hawng a, March 1-3, 2023 chhung khan Zonun Kutpui hi hman a ni.
