February 20, 2023 (thawhtanni) khan Chhiahtlang Hmar Veng Branch YMA ten 'Zokhua' an siam thar chu nimin khan Pi Carol VLMS. Dawngkimi, Director, Art & Culture Department chuan a hawng.
Chhiahtlang Hmar Veng Far Huan Tlang-a Zokhua hawngtu Art and Culture Department Director Carol VLMS. Dawngkimi chuan thusawiin,' Chhiahtlang Hmar Veng khawtlang tangrualin hnatlanga hetiang Zokhua tha tak an din chu lawmawm a tih thu sawiin, thalai ten an hmuh phak tawh loh hmanlai Mizo In leh Zawlbuk te hetianga sak a ni thin chu ropui an tih thu a sawi a, heng Zokhua te hi Mizoram in mikhual pawimawh a neih thin ten ngai pawimawha an tlawh ngei thin thu leh Mizote pawh hian kan ngaihhlut a pawimawh thu a sawi bawk. Art and Culture Department Director chuan Chhiahtlang Hmar Veng Branch YMA te hnenah hian Rs. 30,000/- a hlan nghal bawk a ni.
He hunah hian Khual zahawm leh Serchhip DAO Tlangtinmawia Zote pawhin thusawiin Pi leh pute sulhnu pholanna Zokhua din chu thil hautak tak anih thu leh hetiang buatsaih thei tura Chhiahtlang Hmar Veng Branch YMA te inpekna chu a lawmawmin a fak thu a sawi a, naupang zawk leh thangthar ten kan pi leh pute sulhnu an theihnghilh mai loh nana Zokhua chu din anih thin thu te, chu chuan ken tel pawimawh tak a neih chu Zo nunze mawi bo mai tur humhalh anih thu te a sawi a. YMA chu nihliap lian tak ang a nih thu sawiin, a hnuaiah tanpui ngaite pawh an zavai a an len thu leh YMA kalphung chu kan Kristianna nen a inhmu rem tlat tur anih thu a sawi a, a hlutna chu chapo pui tur anih loh thu sawiin, “Midangte tana malsawmna ni turin kan YMA chempui hi Pathian thu in i tat hriam ang u,” a ti bawk.
Chhiahtlang Hmar Veng Branch YMA President Lalneihkima Varte kaihhruai he hunah hian Branch YMA Vice President Hmangaih-chhunga chuan he Zokhua din tura hma an lak dan te tarlangin, Chhiahtlang khua in thalaite leh mipuite len khawthawnna tur hmunhma an neih that loh avangin Far Huan tlang, Forest Department Rest House awmna hmun ni thin chu Zokhua atan hian thing awmsa te ti chhe lova enkawl an dil chu an remtih angin hma an lak tak thu a sawi a. Zokhua a In hrang hrangte hi an Branch huamchhunga awm te Group hrang hrangah inthenin hnatlanga an sak thu leh mi tlawmngai ten sum leh pai leh thildang te an thawh thu a sawi a. Hnatlang tha 700 vel zet an sen thu a sawi bawk.
He hunah hian Serchhip District Fisheries Development Officer Lucy Lalrinpuii, Serchhip Sub-Hqrs. YMA President Kawl-thuama, Chhiahtlang North VCP C. Lalrawna leh Chhiahtlang South VCP H. Lalrinawma bakah MJA (SD) President C. Lalhminghlua te pawhin thu an sawi bawk a ni.
Nimin-a hawn tak Chhiahtlang Hmar Veng-a Zokhua hi a duh apiang tana tlawh theih tura ruahman a ni a, mi pakhat tan luh man Rs. 20/- zel niin naupang kum 5 hnuailam tan luh man a awm dawn lo thung a, lirthei kenglut tur tan ke hnih nei-ah Rs. 50/- leh ke li nei chin ah Rs. 100/- a ni ang a, nileng-a hman duh tan Rs. 1500/- niin zan lamah tlawh leh kal phal a ni dawn lo thung a ni. Chhiahtlang Hmar Veng Branch YMA ah hian member 316 awmin Mipa 182 leh Hmeichhia 131 bakah Life Member mi 3 te an ni a, In 128 a awm bawk a ni.
