Vawiin January 16, 2024 khan Chief Minister  Conference Hall-ah Chapchar Kut, 2024 hman dan tur relin Organising Committee te an thukhawm a, Chairman Pu Lalduhoma, Chief Minister-in a kaihhruai a ni. Chapchar Kut Organizing Committee ah hian Chief Minister chu Chairman niin Art & Culture Dept. Minister chu Co-Chairman a ni. Art & Culture Department Secretary chu Vice-Chairman niin, CYMA General Secretary chu Secretary a ni a. Art & Culture Dept. Under Secretary chu Asst. Secretary niin Art & Culture Dept. Deputy Director/DDO chu Treasurer a ni. .

Chapchar Kut Organising Committee hian, Chapchar Kut hi ni khat hman ni se an ti a, kut pa tur leh kut thlengtu tur te an ruat nghal a ni. Mizoram hmun hrang hranga Chapchar Kut hmanna tur sum, district tinah te leh Mizoram house tina sem darh dan tur siam fel a ni a. Chapchar Kut hmanna tur sum hi sawrkar budget-ah dah a ni ngai lova, kumtina kan hman thin, kan ni pawimawh a nih avangin nakkum atang chuan sawrkar budget-a dah a nih tawh tur thu Organising Chairman, Chief Minister hian a tarlang a ni. Kut thupui (theme) atan "Zonun Zemawi - Tlawmngaihna" tih chu thlan a ni.

Sub-committee din tul awm te leh Souvenir editorial board te an din a, department dangte nena thawhhona (convergence) awm thei te, exhibition buatsaih dan tur te, food court buatsaih theih dan tur te leh thil pawimawh dang te an ngaihtuah a ni.