20.04.2026 (Thawhṭanni) chawhma dar 11:00 A.M. khan Chief Secretary Conference Hall-ah State Level Committee on Gyan Bharatam Mission an thukhawm a, Pu Khilli Ram Meena, Chief Secretary chuan kaihruaiin Mizoram chhunga Gyan Bharatam Mission hnuaia hmalakna awm tawh hrang hrang te, hmalak zui dan turte sawiho a ni.

Gyan Bharatam Mission hi Ministry of Culture hnuaia Central Scheme niin India ram puma kutziak hlu bik (Manuscript) zawnchhuah hna beihpui thlakna a ni. Heng kutziakte hi pi leh pute kut hnu hlu tak takte an ni a, heng an sulhnute hi tunlai thiamna hmanga vawnhim beihpui thlak a nih tur thu kum 2025 Independence Day thuchahah Prime Minister pawhin a lo puang tawh bawk a ni. April 1, 2026 khan he Gyan Bharatam Mission atan hian Mizoramah State Level Committee leh District Level Committee din a lo ni tawh a, chak zawka bawhzui a nih theih nan leh hmalak dan tur hrang hrangte State Level Committee ṭhukhawm hian an rel a ni.

Kan pi leh pute sulhnu, an kutziak (Manuscript) hrang hrangte hi an riral mai loh a, vawnthat an nih theihna tura hmalakna kawng hmasa ber hi a zawnchhuah hna a ni a. Khawi hmunah nge, tu hnenah nge, Manuscript engzat nge an kawl tihte Gyan Bharatam Mobile Application hmangin Report tur a ni. He Gyan Bharatam Mobile Application hi mitinin an hmang thei a, Manuscript zawnchhuah leh Report hna hi mitinin an tih theih vek a ni. Heng Manuscript-te hi inchhuhsak tur a ni lo va, a neitute remtihna thlapin uluk taka thla lak a, a Soft Copy chauh hi vawnhim tura lak tur a ni a, a tak (Original) erawh a neitute kutah a awm zui zel ang.

Art & Culture Department chu State Nodal Department an nih angin bawhzui tura tih an ni a. Hemi kawngah hian chak zawka hma lak a nih theih nan te, a awmzia leh a kalphung hrang hrangte zau zawka inzirtirna nei turin tun kar chhung hian Art & Culture Department-a thawktute chu District tinah feh chhuakin Awareness Campaign an kalpui ang.