Vawiin December 6, 2023 (Nilaini) khan Art & Culture Department leh Serlui Group YMA  tangkawp buatsaihin Dhalcherra-ah Cultural Meet neih a ni a, Pu F. Lalthanmawia, Senior Research Officer, Tribal Research Institute, Art & Culture Department chuan Khuallian niin a hmanpui. 

Cultural Meet hi Cinnamon English Medium School, Dhalcherra-ah neih a ni a, Pu  C. Lalhmachhuana, Vice President, Serlui Group YMA chuan Cultural Meet Programme hi a kaihruai a, Pu Ngirthawiliana,  Dhalcherra chuan hunserh a hmang a, Nl Jenny Ramropuii, Kawnveng Branch, Bilkhawthlir-in thiam taka zaiin mipui a awi a, Pu Aldrin Ralhrangluaia, Secretary, Serlui Group YMA chuan inlawmna thu sawiin inhmelhriattirna hun a hmang bawk. 

Khuallian Pu F. Lalthanmawia chuan thu sawiin "Mizo nihna humhim zel turin tlawmngaih, rinawm leh hnam ziarang hriat leh thiam a pawimawh a, kan inpumkhat zel nan hnam lam thiam hi a hlu lehzual a; mahni hmazawn theuha theihtawp chhuah hi kan mawhphurhna a ni, " tiin Dhalcherra a Cultural Meet hi a hawng a ni. Pu Z. Lalremliana, President, Serlui Group YMA leh Pu Lalthannghaka, President, Dhalcherra Branch -te hnen atangin thusawi ngaihthlak a ni a, Chairman in lawmthu a sawi bawk. 

Cultural Programme hi hmang chhunzawmin Pu CS Lalthlamuanga Group Executive Committee member in a kaihruai a. Serlui Group huam chhunga YMA Branch hrang hrang - Dhalcherra Branch, Kawn Veng Branch-Bilkhawthlir, Dawr Veng Branch-Bilkhawthlir, Saipum Branch , N. Chhimluang Branch, Kawngthar Veng Branch-Vairengte, Bagbahar Branch  leh Kualmawi Branch-Bilkhawthlir atang te in Mizo hnam lam hmuhnawm tak tak entir a ni a; a kar lakah zai mawi tak tak ngaihthlak a ni bawk. 

Serlui Group huam chhungah hian YMA Branch 29 awmin member  8000 chuang an awm mek a, chung zinga Branch pali (4) te chu Mizoram pawna awm an ni.