March 19 - 21 chhunga Chaltlang Field, Aizawl-a neih tur Doordarshan Mizo Indigenous Games Grand Finale 2024-25 chu vawiin khan Pi Carol V.L.M.S. Dawngkimi, Art & Culture Department chuan Khuallian niin a hawng.

Doordarshan Mizo Indigenous Games 2024-25 hi Broadcasting Infrastructure and Network Development (BIND) scheme hmangin Doordarshan, MIGA te leh NGO hrang hrang te tangkawpin an buatsaih a ni a, kum 2024 atang tawh khan District hrang hrang 11-ah Mizo Infiamna heng - Insuknawr, Inbuan/Inchai, Inarpathai, insaihruipawh leh inkawibah te hmangin an lo buatsaih tawh a, chunga a ti tha te chuan Grand Finale-ah hian inelna an nei a ni.

Khuallian Pi Carol VLMS Dawngkimi chuan thusawiin, "heng kan hnam infiamna te hi min thuikhawmtu leh inhmelhriatna tha min siamsaktu pawh an ni thin; kan pipute hunlai khan Zawlbukah mikhual an buan thin a, khual buan an ti a, intih tlangnelna, inthianthatna leh inlawmna a keng tel thin. Vawiina Mizo Infiamna hmanga intihsiak tur zawng zawngte pawh hian kan chakna, kan thiamna leh kan theihna kan lantir rual khan kan hnam nunze mawi nen a in zawm tlat a ni tih hria in - inthianthat nan, inpumkhatnan te hmang zel turin kan fuih duh che u," a ti.

'Vawiina Mizo Infiamna buatsaihtu zawng zawng te, he intihsiaknaa lo tel zawng zawng te leh chhim tu zawng zawng te hian – kan hnam tih dan leh chin dan Culture & Tradition hi hnama min dintu Pathianin kan hnam tana min pek a ni tih hria ila, hlut thiam ila, chawinung zel turin rilru i siam ang u. He hnam hian a tihdan phung leh a chindan te a kalsan zel chuan hnam anga kan inhungna hian awmzia a nei lo telh telh ang, chuvangin kan hnam tan tiin theihtawp i chhuah zel ang u', tiin kalkhawm te a fuih bawk.