Vawiin 27 June, 2023 hian Pi Carol VLMS Dawngkimi, Director, Art & Culture Department chuan Lunglei khawpui chhunga Art & Culture Department hnuaia Office hrang hrang te tlawhin hun a hmang. Director hi Pi P.C. Zosangpuii, SRO leh Pu R.K. Lalawmpuia, District Art & Cultutre Office, Lunglei leh Staff ten an lo dawngsawng a ni.

Director hian Saikuti Hall-a District Museum, Lunglei a tlawh a, Pu R. Lalrinawma, Museum Assistant-in a lo dawngsawng a, Lunglei District Museum-ah hian Museum Objects 975 lai lakkhawm a ni tawh a, kum 2021-2022 khan tlawhtu mi 2021 an nei. Saikuti Hall-a District Library a tlawh chhunzawm nghal a, Nl. Vanlalhruaii, Librarian-in a lo dawngsawng a, LUnglei District Library-ah hian Lehkhabu 32650 lai lakkhawm a ni tawh a, member 1516 an nei bawk.

Director hian District Art & Culture Office, LUnglei tlawhin Meeting a neih pui nghal a. Pi P.C. Zosangpuii, SRO chuan inlawmna thu sawiin Pu R.K. Lalawmpuia, SO chuan LUnglei District Office hnathawh dan leh kalphung te sawiin hun a hmang zui a, tin, staff ten District Office tana an mamawh chi hrang hrang te an lo thlen a ni. Director hian thusawiin, District Art & Culture Office, LUnglei te hnathawh a that thin thu leh theihtawp chhuah chhunzawm turin a chah a, thawk tute hnenah inpawhna leh thawh hona tha nei a, midangte tana tangkai nih tum tlat turin a chah a ni.

Lunglei District Art & Culture Office hi August 19, 1998 khan din tan a ni a. Tuna District Office Building hi June 22, 2016 khan hawn a niin luah nghal a ni a, Ground Floor hi Motor Parking atan hman a ni a, 1st Floor hi Office atan hman a niin 2nd Floor hi Dance Training Hall-ah hman a ni a, a chung berah Auditorium mi 100 bawr leng a awm bawk a ni. District Office-ah hian thawktu mi 7 an awm a - Literature, Culture, Fine Arts, Library, Museum & Archives te bakah  Department Programe hrang hrang buatsaihin hna an thawk thin a, District Library, District Museum, A&C Auditorium leh Multipurpose Cultural Complex (MPCC) Sazaikawn te an enkawl bawk a ni. 

Director hian Farm Veng Branch YMA leh Electric veng Branch YMA Library, Lunglei-te a tlawh nghal a, YMA hruaitute leh Library enkawl tuten an lo dawngsawng a ni. Naktuk June 28, 2023 hian Sazaikawn, Lunglei-a District Museum Building sak mek a tlawh anga, thu thar thehdarh tute nen hun an hmang ho dawn a ni.