Vawiin ni 28 June, 2023 hian Pi Carol VLMS Dawngkimi, Director Art & Culture Department chuan Sazaikawn, Lunglei-a District Museum Building, Ministry of Culture , Governent of India tanpuinaa sak mek chu a tlawh a, he hunah hian DIPR - Lunglei, DDK - Lunglei, Zonet Cable Tv leh LPS Cable Tv Correspondent - Lunglei te, LDF Cable Tv Correspondent-te, Mizo Academy of Letters (MAL) - Lunglei leh Art & Culture Department Officer leh Staff-ten an tawiawm a ni.

Lunglei District Museum sak nan hian Central Sawrkar-in Rs. 827 /- lakhs tumin Mizoram Sawrkar-in Rs. 91.91 /- lakhs a tum ve a ; tunah hian Rs. 620.41 lakhs hman tawh a niin, final installment nghah mek a ni. He building Contract hna hi Okahito Consultancy Services, Khatla, Aizawl ten an thawk a ni.

Lunglei District Museum building sak mek hi sak zawh tep a ni tawh a. Museum-ah hian Gallery hrang hrang dah tum niin heng zingah hian Lunglei District History tarlan theihna tur Gallery/Section pawh dah tura ruahman a ni a. Lunglei District huamchhunga mimal, chhungkua, pawl, kohhran-te leh sawrkar office hrang hrangten Lunglei District History tana pawimawh thil hlu kawl kan nei a nih chuan Lunglei District Museum-ah tlawmngaia dah turin Art & Culture Department a sawmin a ngen a. Tin, Mizo hnam tana pawimawh leh hlu nei leh kawl ten Lunglei District Museum-a dah thei tur hian ngaihtuahna lo seng a, lo inruahman lawk turin Art & Culture Department chuan Lunglei District huamchhunga mipuite a ngenin a hriattir bawk. Museum object lak khawm (collection of museum objects) dan kawng hrang hrang a awm a, chungte chu : Purchase, Gift, Loan, Exchange, Treasure Trove, Chance Finding leh Excavation-te a ni a. Ram leh hnam tana thil hlu tak, mahni in lama kawl mek te tan engemaw huna a riral mai lohna tur leh tha zawk leh mumal zawka enkawl chunga mipui tana tangkai zawka pholan a nih theihnan Museum-ah hian a Donate theih reng a, chungte chu a petu hming, nihna leh pekchhan te nena tarlang a ni thin. Tin, mimal ta emaw,  pawl ta emaw,  museum danga mi emaw kan museum-a dah atana kan duhte kan hawh thei a. Hunbi tiam chhung atana hawh a nih chuan ‘Temporary Loan’ a ni a, Terms and Conditions fel tak siama hawh thin a ni.

Pi Carol VLMS Dawngkimi, Director, Art & Culture Department chuan MAL, Lunglei leh Press mite hmaah thusawiin, District Museum, Lunglei sak mek hi India ram chhungah pawh chhuanawm tling pha tura a beisei thu leh a sak hna thawktute pawhin an theihtawp an chhuah thu a sawi a. Museum tha leh hlu kan neih ngei theih nana theihtawpa tan lak pui turin Lunglei mipuite a sawm a ni.

Director hi Lunglei Sub Hqrs. YMA hruaitute nen inkawmna hun tha tak an nei zui a, Lunglei District huamchhunga hnam hrang hrangte hnenah Mizo hnamlam leh zai hmanga Mizo culture thehdarh kawnga tanlak dan tur an sawi ho a ni.