Pi Carol VLMS Dawngkimi, Director, Art & Culture Department chuan vawiin May 18, 2023 khan Art & Culture Department hnuaia Subordinate Office hrang hrang -  District Library - Aizawl, Mizoram State Library leh Vanapa Hall te a tlawh kual a, Subordinate Office-a Officer leh Staffs te infuihtharna leh Office mamawhna te sawi puina hun tha tak a hman pui. Director hi Pu Lalchuailova, Deputy Director, Pu Vanlalhuma Singson, Archaeologist, Pu P.B. Lalrinkima, Programme Co-ordinator leh Pu Lalchhandama, Technician ten an tawiawm a ni.

Art & Culture Department hnuaia hna hrang hrang thawk tute chuan Director-in an hnathawh dan te en pui a, an mamawh leh harsatna te a sawipui hi hlawk thlak an ti hle a, Programme tha leh hlu tak a nih thu sawiin lawmawm an tih thu an sawi a ni. Pi Carol VLMS Dawngkimi, Director chuan mahni hnathawh theuh ah rinawm tak leh thahnem ngai taka thawk theuh turin staff-te a fuih a, thawhhona tha tak nei zel tur leh hnathawhna kawngah inzir zel tur leh hmasawn zel turin Subordinate Officer -te leh Staff-te a chah a ni. Director hian Museum Extension Building-a Gallery Showcase leh tul dangte siama hnathawh mek chu a tlawh nghal bawk a, hna thawh tawh te leh hma lak zek na tur te chu enzuiin, a tul anga hma lak a tum thu a sawi a. Museum Extension Building hi nuam tak leh en nawm tak tura siam a nih theihna turin hnathawk tute a fuih bawk a ni.

Aizawl khawpui chhunga Subordinate Office - Mizoram State Archive leh Mizoram State Museum -te tlawh a, staff-te nena inkawmhona hun hi hun remchangah la neih chhunzawm tura ruahman a ni.