G-20 Summit, Aizawl Mizoram-a kan thlen zawh tak kha Business (sumdawnna/hna etc.) chungchang bik sawihona a nih avangin Business-20 (B-20) tiin a hming dang vuah a ni bawk a, India hmarchhak state 4 khawpui, Imphal, Manipur (17-19 Feb) Aizawl, Mizoram (1-3 March), Gangtok,Sikkim (16-19 March) leh, Kohima, Nagaland (4-6 April) ah te neih zel tura ruahman a ni. Mizoram, Aizawl bik atan hian, home commissioner, Pu H. Lalengmawia kaihhruaiin he G20/B20 committee thlenna tur atan hian committee din a ni a. He committee hnuaiah hian sub committee chi 9 zet din niin Art & Culture Department pawh Core Committee pawimawh takah telh niin G20 Delegate-te lo hmuahnaah leh thlahnaah te, Chapchar Kut hmanna Aizawl Lammual-a lo mikhual-ah te mawhphurhna pawimawh tak kan chang a ni.

March 1, 2023 leh March 3, 2023-ah te khan G20 Delegate te lo thlen tirh leh an haw tur thlahnaah Cultural Programme buatsaih a ni a, Khuallam leh Darbu zaipawl leh Mizo Folk Music-te entir a ni. Chapchar Kut Programme Sub-Committee-te ruahman angin G20 Delegate pual hian felfai takin an thutna tur leh an chet velna tur siam sak an ni. G20 delegate-te hi Chapchar Kut hmannah khualtha an nih avangin Chapchar Kut inbuatsaihna pawh felfai lehzuala buatsaih a ni a, sawrkar hnuaia Department hrang hrangte nen tang tlangin thawhhona tha tak kan nei a, Art & Culturer Department chuan lawmthu a sawi a ni. Tin, G20 Delegate-ten an tlawh theih turin Zokhua, Falkawnah Zonun Kutpui buatsaih niin March 1, 2023 khan Pu R. Lalzirliana, Art & Culture Minister chuan a hawng a, tin, Vanapa Hall thuam that a ni bawk.