Vawiin September 19. 2025 khan Pu C. Lalsawivunga, Minister, Art&Culture Department chuan Vanapa Hall-ah Art & Culture Department leh Mizo Cultural Organisation (MCO) tangkawp buatsaih, High School leh Higher Secondary School Zirlaite tana Mizo hnam lam intihsiak hmawrbawkna hun (closing function) chu khuallian niin a hmanpui a. Intihsiakna lawmman a sem nghal bawk a ni.

He hunah hian khuallian Art & Culture Minister Pu C. lalsawivunga chuan thusawiin, Zirlaite zinga hnam nunphung pawimawhzia inzirtirna ni fawma intihsiakna hlawhtling tak buatsaih a ni chu lawmawm a tih thu a sawi a. Zirlai kalkhawmte chu Mizo hnam nunphung (culture) vawng nung leh tihmasawn zel tura chahin, hnam ropui apiangin mahni hnam nunphung an ngaisang thin tih a sawi a. Mizote chu zai leh lam ngaina tak hnam kan ni tih sawiin, chung thilte chu khawvel mit hmuha pho lan tlak khawpa chawisang zel turin kalkhawmte chu a fuih a. Zai leh lam baka Mizo hnam rohlu aia upate zahna chu uar thar leh zual tura Zirlaite chu chahin, Mizo nula tlangval, aia upa zah thei tak, ruihtheihthil laka fihlim nih tum theuh turin a chah bawk a ni.

Intihsiakna in chawhma dar 10:30 atanga tan niin Pi Zirsangzuali, Deputy Director, Art & Culture Department chuan a kaihruai a. Intihsiak kharna puala hun hman hi Pi Carol V.L.M.S. Dawngkimi, Director, Art&Culture department chuan kaihruaiin kalkhawmte lawmna thu a sawi a. Pu Lalbiakhlua, General Secretary, Mizo Cultural Organisation chuan intihsiak chungchang report pein, intihsiak lawmman semin a zui a. Pu F. lalthanmawia, Jt. director, Art&Culture Department chuan lawmthu sawiin hun hi a khar a ni.

Intihsiakna hi High School leh Higher Secondary School zirlaite zinga Mizo hnam lamte inzirtirna leh a pawimawhnate inhrilhhriatna atana tih a ni a. Intihsiakna atan hian Mizo hnam lam thenkhat Buhza Aih, Cheraw leh Chheihlam te chu thlan chhuah niin School 17 an tel a; hetiang hi result a ni.

Pakhatna - Govt. Mizo High School niin Trophy leh pawisafai Rs. 50000/ an dawng. 

Pahnihna - Greenland Higher Secondary School niin Trophy leh pawisa fai Rs. 30000 /- an dawng.

Pathumna - St. Paul’s High School-te niin Trophy leh pawisa fai Rs. 20000 /- an dawng.

School tel zawng zawng hian Certificate leh Rs. 5000 /- an dawng bawk.