Vawiin May 11, 2023 (Ningani) hian Art & Culture Department chuan Hnahthial District pualin Hnahthial khua-ah Museum & Record Exhibition Cum Book Sale a buatsaih a. He Exhibition Cum Book Sale hawnna inkhawm hi GSA Hall, Electric Veng, Hnahthial-ah neih niin Pu Lalvenhima, MCS, Addl. Deputy Commissioner, Hnahthial District chu khuallian a ni. 

Hawnna inkhawm hi Pu F. Lalthanmawia, Senior Research Officer, Tribal Research Institute chuan a kaihruai a, Pi P.C. Zosangpuii, Museum Curator chuan lawmthu sawina hun a hmang a ni. Khuallian Pu Lalvenhima chuan thusawiin, "Mizo hnam rohlu hrang hrang vawnghimna tura kawng hrang hranga hnathawk thin Art & Culture Department-in Hnahthial District puala hnam rohlu chi hrang hrang kenga Exhibition an nei hi Hnahthial District tana chhinchhiah tlak  a ni;, a ti a, Hnahthial khaw mipuite chu he Exhibtion atanga an thil hmuh leh hriatte MIzo hnam tana hmasawnpui turin a chah a, tun aia nasa lehzuala lehkha chhiar uar a tul zia a sawi bawk.

Museum & Record Exhibition Cum Book Sale Art & Culture Department hnuaia Office - Tribal Research Institute leh Mizoram Publication Board - ten Lehkhabu hlu tak tak pho chhuakin an zuar a. Mizoram State Museum ten Museum objects chi hrang hrang phochhuakin leh Mizoram State Archives ten  Mizoram-a document hlu leh pawimawh tak takte an pho chhuak bawk a ni.

Museum & Record Exhibition Cum Book Sale-ah hian Hnahthial khawchhung atangin Hnahthial College, School hrang hrang 20 vel leh NGO hrang hrang atang tein Exhibtion an chhim a ni.