Vawiin May 15, 2024 dar 11:00 khan Art & Culture Department Director's Conference Hall-ah Institute of Music & Fine Arts (IMFA) 68th Batch zirlaite lo lawmna hun hman a ni a. Pi Carol VLMS Dawngkimi, Director Art & Culture Department chuan IMFA hnuaia 68th Batch – Music, Dance leh Drama zir turte lawmmna programme hmasa ber hi a hmanpui a, Director hian thusawiin Art & Culture hnuaia 3 months course chu ngaihlu a, an hun leh tha seng tur a an rawn kal chu lawmawm a tih thu a sawi.
IMFA 68th Batch zirlaite lawmna programme hi hun hnih a hman a ni - Dance wing leh Drama Wing te pualin hman hmasak a ni a, Music wing te pualin hun hman chhunzawm nghal a ni.. Pi Carol VLMS Dawngkimi chuan he course tan anih theih nan leh student te tana classroom tha zawk an neih theih nana department in hma a lo lak dan te a sawi a. Director hian zirlaite chu nungchang tha nei turin a fuih a, instructor te zahthiam tur te, Art & Culture Department chu hnam lam leh zai te humhim tu tur an nih avangin a tih dan tur dik taka kan hman a tul thu a sawi tel a ni.
Dance & Dram Wing - Hnam lam zir tur hian mi 32 in interview an pal tlang a, hemi atang hian mi 18 chu he inaugural function ah hian an rawn tel thei a ni. Rawn kal ve thei ta lo te hi college examination vanga rawn kal thei lo te an ni.
Pu Lalchuailova, Deputy Director chuan Dance and Drama zir turte fuihna hun a hmang a, kan hnam lam zir te hlutna hi kan hriatchian lehzuala tul thu a sawi a. Certificate Course a nih avangin a hlut bikna a sawi bawk. Zirlaite hi theihna zawng zawng nen a zir zo turin a fuih a, heng te hi kan hnam tana kan rawngbawl theihna anih vangin tha taka zir turin duhsakna a hlan a ni.
Dance Instructor Dr. Runremsangi, Padma Shree chuan heng hnam lam te hi Mizo kan nihna min hriatchian tir tu anih vangin lehkha thiamna leh changkannaah te hian kan hnam ziarang hi a len vek thu sawiin, khawtlang leh kan zoram nghawng thei anih vangin tha taka zir turin a chah bawk a ni.
Music Wing - Music rawn zir tur hian mi 28 in interview paltlangin inaugural programme ah hian zirlai 26 an rawn tel thei a ni.
Pu F. Lalthanmawia, Deputy Director chuan thu sawiin zirlaite hi ruihtheihthil laka fimkhur turin a chah a, nungchang tha leh mawi nen music hi a kal kawp theih thu a sawi a, a tawp thleng a zir chhuak ngei turin a fuih a ni. Mahni tan ni mai lo, khawtlang leh hnam tana an thiamna te hmang turin a chah bawk ani.
IMFA hnuai atanga zirchhuak tawh hlawhtling tak tak te sawii, zirlai te pawh an hlawhtlin ve ngei theihnan duhsakna a hlan bawk. Heng bakah hian time management te zir turin a chah bawk a, class te a hun takah tan anih theih nan pawimawh dang te kalsana zir thin turin a chah bawk a ni.
Pu R. Lalchungnunga, Instructor chuan zirlai te hi zirlai ti buai thei lakah insum turin a chah a, he 3 months course chhung hian tha taka an zir theih nan tulna dangte chu kalsanin tha taka zir chhuak ngei turin a chah a, heng bakah hian musician te hriattur pawimawh tak tak te sawiin duhsak a hlan bawk a ni.
Download
