Vawiin August 28, 2024 chawhnu dar 1:00 khan Vanapa Hall Art & Culture Department hnuaia Institute of Music and fIne Arts (IMFA) 68th batch Graduation Day hman a ni a, Pu C. Lalsawivunga, Hon’ble Minister, Art & Culture Department chuan khuallian niin a hmanpui. Pi Carol VLMS Dawngkimi, Director, Art & Culture Department chuan programme kaihruaiin, Art and Culture Department officer & staff, IMFA zirlai nu leh pa te, college hrang hrang zirlai thenkhatte leh mi pawimawh sawm bikte an tel a ni.

Khuallian Pu C. Lalsawivunga, Art & Culture Minister chuan thu sawiin, IMFA a zirlai chhuak mai turte chu hnam nunphung vawng nung tlat zel tura fuihin, hnam changkang apiangin mahni hnam nun vawnhim leh chawisan chu khawi hmunah pawh awm se, an ngaih pawimawh ber a ni, a ti a. Kan hnam rohlu zo nunmawi, aia upate zahna leh tlawmngaihnate chu vawnghima chhawm nung zel turin kalkhawmte chu a chah nghal bawk a ni.

IMFA zirlaite atangin lemchan (drama wing), Mizo hnam lam (dance wing)  leh Music Band hrang hrangte (music wing) zai hmuhnawm tak takte entirna neih a niin result puanna leh certificate semna neih zui nghal a ni a. IMFA Instructor te aiawhin Pi KC Runremsangin thu a sawi a, IMFA zirlaite atangin thusawi ngaihthlak a ni bawk. Zirlaite hnen atanga Item hmuhnawm tak tak thlirho a nih bakah, zaithiam sawm bik te'n Mizo zai hmanga kalkhawmte an awih hnuin, Pu Lalchuailova, Dy. Director, Art & Culture Department chuan lawmthu sawiin hun hman a khar a ni.

68th Batch IMFA atang hian Modern Music-ah zirlai 20 in exam paltlangin  tha takin an pass vek a; Mizo Folkdance-ah zirlai 28 in exam paltlangin 26 an pass a; Mizo Folk Dance leh Modern Music zirlai mi 25 ten Condensed Course Drama zir leh in tha takin an pass vek a ni.