Vawiin June 9, 2023 chawhma dar 10:30 khan Archives Conference Hall, Babutlang, Aizawl-ah International Archives Day Vawi 75-na hman a ni a, Pi Carol VLMS Dawngkimi, Director, Art & Culture Department chu khuallian a ni a. MIzoram State Archives, Art & Culture Department-in Archives Newsletter an buatsaih thar "Tungchaw" chu a tlangzarh nghal a ni.
Pu Lalmuanpuia, Archivist, Mizoram State Archive chuan inkhawm a kaihruai a, Pu C. Lalmuanpuia, Chemist-II chuan report pe-in Archives Newsletter 'Tungchaw' kalphung tur leh buatsaih a nih dan a sawi fiah nghal a. Khuallian Pi Carol VLMS Dawngkimi, Director, Art & Culture Department chuan thusawiin, 'Record vawn that hian hmasawnna min thlen thei a, min ti chak a, dinna nghet takah min din tir thin' a ti a, Mizoram sawrkar, Kohhran leh pawl hrang hrang ten awmze nei taka Record kan vawn that theihnan Art & Culture Department chuan kawng kawhhmuhin kan tanpui thei reng a, tin, record pawimawh te ti ri ral lova awmze nei taka vawnghim zel turin a ngen a, Mizoram State Archive-in Journal tha leh hlu tak 'Tungchaw' an buatsaih hian Record vawn him kawngah Awareness nasa lehzuala a thlen a beisei thu sawiin a tlangzarh nghal a ni.
Pu R. Hmingthanzuala, Director (Rtd.) Art & Culture Dept., Pu Joseph Lalzarliana, Asst. Prof. MZU leh Pu Dominic Lalhmangaiha, Roman Cartholic Cathedral aiawh ten thusawina hun an hmang bawk a. International Archives Day vawi 75-na pual hian paper zirhona hun hman a ni a, Resource Person Pu F. Lalthanmawia, SRO, TRI chuan 'Archives kalphung leh a pawimawhna te' sawiin zirho nghal a ni a, heng bakah hian kal khawm te atangin Records vawng him kawnga an hmalakna leh harsatna ngaihthlak niin hlawk taka hun hman zui a ni.
International Archives Day puala Seminar-ah hian Mizoram Synod atang te, Baptist Church of Mizoram (BCM) atang te, UPC (NE) Kohhran atang te, Roman Catholic Cathedral atang te, Aizawl Theological College atang te, Mizoram University leh ICFAI bakah Mara Autonomous District Council (MADC) leh Hnahthial College atangte in an rawn tel a. Tin, Sawrkar Department atangin Agriculture Dept., Tourism Dept. leh Art & Culture Department Subordinate Office hrang hrang atangin an tel bawk a ni.
Vawiina Release Archives Journal 'Tungchaw' hi kum khatah vawi 3 chhuak tura ruahman a ni a, sawrkar Department zawng zawngte bakah Kohhran hrang hrangten a thlawn a an dawn theih turin Copy 50 siamin bul an tan a ni.
