May 17, 2019 (zirtawpni) khan Mizoram State Museum, Art & Culture Department chuan International Museum Day an hmang a, Pu R. Hmingthanzuala, Director, Art & Culture Department chuan Khuallian niin International Museum Day lawmna hi a hawng a, he ni pual hian mipui tan en man awm lovin Museum an hawng. He ni hmang tur hian a bikin Mizoram Upa Pawl (MUP) General Hqrs. leh Aizawl City MUP Branch zawng zawngte leh Diet, Aizawl-te an sawm. Khawvel pum puia Museum hrang hrangten ni bik, mahni remchan ang theuha a ruala an hman tlan turin Inter-National Council of Museum (ICOM)-in kum 1977 khan May 18, 2019 hi International Museum Day atan a puang a, kumin-ah May 18 hi Inrinni ni (government holiday) a nih avangin May 17, 2019 hian hman a ni.. Kumina khawvela pumhuapa International Museum thupui hi “Museums as Cultural Hubs, the future of Tradition” tih a ni.
International Museum Day hmanna Inkhawm hi Mizoram State Museum-ah neih a ni a, Pi P.C. Zosangpuii, Museum Curator chuan inkhawm a kaihruai a, Khuallian Pu R. Hmingthanzuala chuan thusawiin “Mizoram State Museum-in a tum pakhat chu Mizo nunphung leh nun zemawi te chawi nung zel chunga thang lo thar zelte hnena kan hnam nun zia leh nunphung ataka hmuh tir leh thiam tir hi a ni” a ti a, “Mizo hnam lo dinchhuah zelna tur leh kan hnam inpumkhat zelna turin kan nihna dik kan hriat chian a, chu kan nihna chu zahpui lova, chhuang tak chunga chawi lar a, chawi nung zel turin Mizoten tan la zel ila, kan hnam thilte kan hriatchian hmasak a, hnam dangte pawh hrilh thei tur khawpa kan zir chian hmasak a ngai a ni”, a ti bawk..
Mizoram State Museum hian 2018-2019 sawrkar kum chhung khan tlawhtu mi 13157 an nei a, heng zinga mi 14 hi VIP an ni a, foreigner visitors mi 33 an nei bawk. Mizoram State Museum-ah hian Gallery 6 (paruk) a awmin Museum objects 2679 an nei mek a, heng zinga 729 te hi show case chi hrang hrang 109-ah pho chhuah a ni a, a bak zawng hi reserve collection-ah dah a ni. India hmun hrang hrang heng Tribal Museum, Ranchi-ah te, Bhopal Museum-ah te, Silpigram Museum, Guwahati-ah te, Jawahar Lal Nehru Museum Itanagar-ah te Mizo hmel lanna Museum Objects hi eng emaw zat thawn an ni tawh a ni
Entry fee hi puitling pakhat tan Rs.20 /- leh naupang pakhat tan Rs.10 /- a ni a. School naupang zirtirtute hruaia educational trip-a lo kalte chu 50 % concession pek an ni a. Tin, kum upa, kum 65 chin chung lam te chu en man chawitir an ni lo bawk. Ram pawn atanga lo kal foreign visitor-te en man atan Rs. 50 /- lak a ni bawk. Museum-a camera (still leh Video) ken luh man hi siam a ni bawk. Museum hi March - September thla inkar chhung zawng chu dar 10:00 AM - 4:00 PM -ah hawn thin a ni a, October - February chhung chu dar 10:00 AM - 4:00 PM-ah hawn a ni thung. Tin, chawlhkar tin thawhtan ni apiang hian chawhma lamah thawktuten Gallery tihfaina hun an hmang thin a, chuvangin thawhtanni-ah chuan Dar 1:00 PM -ah Museum hi hawn thin a ni a. Tin, Inrinni hian dar 10:00 AM - 2:00 PM chhung Museum hawn thin a ni a. Sunday leh Sawrkar Holiday-ah te chuan Museum khar thin a ni. International Council of Museums (ICOM) buatsaih International Museum Day hi nikum 2018 khan khawvel ram hrang hrang 152-a Museum 40,000 –in an hman thu report a ni a, kumin-ah hian khawvel pumpuia Museum 40,000 chuangin an hman beisei a ni bawk.
Govt. Chanmary PS
DIET, Aizawl
