May 18, 2018 (zirtawpni) khan Mizoram State Museum, Art & Culture Department chuan International Museum Day lawmnan mipui tan Museum en man awm lovin an hawng a, tin, he ni hmang tur hian a bikin chanchinbu mi te, School 3 leh Pachhunga University-te sawmin hun an hmang a, mipuiin an hlut hle. Khawvel pum puia Museum hrang hrangten ni bik, mahni remchan ang theuha a ruala an hman tlan turin Inter-National Council of Museum (ICOM)-in kum 1977 khan he ni hi International Museum Day atan a puang a ni. Kumtinin khawvel pumhuapin thupui hrang hrang neih thin a ni a, kumin-a khawvela pumhuapa International Museum thupui hi “hypperconnected museums, new approaches, new publics” tih a ni.

Mizoram State Museum hian 2017-2018 sawrkar kum chhung khan tlawhtu mi 9130 an nei a, heng zinga mi 24 hi VIP an ni a, foreigner visitors mi 10 an nei bawk. Museum en man atangin sawrkarah Rs. 50,020 /- an chhunglut. Mizoram State Museum-ah hian Gallery 6 (paruk) a awm a, Mizoram State Museum hian Museum objects 3757 lai a la khawm tawh a, heng zinga 768 te hi show case chi hrang hrang 107-ah pho chhuah a ni a. A bak zawng hi reserve collection-ah dah a ni. India hmun hrang hrang heng Tribal Museum, Ranchi-ah te, Bhopal Museum-ah te, Silpigram Museum, Guwahati-ah te Museum Objects hi eng emaw zat thawn (Donate) an ni tawh bawk a, April 2018 chhung khan Jawaharlal Nehru State Museum, Itangar, Arunachal Pradesh-a phochhuah turin Mizo hnam ziarang tarlang thei tur Museums Objects 74 lai an dah bawk a. Tunah hian New Secretariate Complex-a Museum Extension Building sak mekah Dio-rama of Natural History, Dio-rama of Cultural Anthropology, Dio-rama of Water animals etc. -te develop turin hma an la mek a. Museum building thar hi Museum of National Character ni tura ruahman a ni, hemi atan hian North East State hrang hrang atangin History & Cultural Depict thei tur Objects chi hrang hrangan lakkhawm nual an tawh a ni.

Ni bika a thlawna Museum entheih ni tih lohah chuan Museum tlawhtu an tam lem lo va. Ni bik, a thlawna Museum en theih hunah entu an tam em em thin a. Chung ni te chu ‘Museum Week’ leh ‘International Museum Day’ te an ni. Entry fee hi puitling pakhat tan Rs.20 /- leh naupang pakhat tan Rs.10 /- a ni a. School naupang zirtirtute hruaia educational trip-a lo kalte chu 50 % concession pek an ni a. Tin, kum upa, kum 65 chin chung lam te chu en man chawitir an ni lo bawk. Tin, ram pawn atanga lo kal foreign visitor-te en man atan Rs. 50 /- lak a ni bawk. Museum-a camera (still leh Video) ken luh man hi siam thar a ni a, hetiang-in Mobile Camera & Ordinary Camera - Rs. 20 ; Digital & Movies Camera - Rs. 100; Video Camera - Rs. 250; Documentary Film - Rs. 1000 /-. Museum hi March - September thla inkar chhung zawng chu dar 10:00 AM - 4:00 PM -ah hawn thin a ni a, October - February chhung chu dar 10:00 AM - 3:30 PM-ah hawn a ni thung. Tin, chawlhkar tin thawhtan ni apiang hian chawhma lamah thawktuten Gallery tihfaina hun an hmang thin a, chuvangin thawhtanni-ah chuan Dar 1:00 PM -ah Museum hi hawn thin a ni a. Tin, Inrinni hian dar 10:00 AM - 2:00 PM chhung Museum hawn thin a ni a. Sunday leh Sawrkar Holiday-ah te chuan Museum khar thin a ni.