Vawiin July 25, 2024 (Ningani) chawhma dar 11:00 khan Tribal Research Institute, Art & Culture Dept., Govt.’ of Mizoram leh Dept. of History and Dept. of Mizo & Cultural Studies, ICFAI University, Mizoram-te tangkawpin an buatsaih ni hnih awh tur International Seminar on Mizo Tobul Chhuina (Tracing the History and Origin of the MizoPeople) chu N.J. Yasaswy Memorial Auditorium, ICFAI University, Durtlang North-ah neih tan a ni a. Pu C. Lalsawivunga, Hon’ble Minister, Art & Culture Dept. etc. chuan Khuallian niin a hmanpui.

 He Seminar hawnna inkhawm hi Pi Carol VLMS Dawngkimi, Director, Art & Culture Dept. chuan a kaihruai a, Pi Lalhmangaihzuali, Translator, Tribal Research Institute, Art & Culture Dept. chuan Seminar report tawi a pe a, Dr. K.C Runremsangi, Art & Culture Dept. chuan Mizo Folk Song sa-in Seminar hmang tute a awi a, Prof. Bijay Singh, Vice-Chancellor, ICFAI University, Mizoram chuan thu tawi a sawi bawk. Khuallian Pu C. Lalsawivunga, Art & Culture Minister chuan thusawiin, ‘ Mizo te hian kan nihna tak tak hre chiang tur chuan kan paltlang tawh te kan hriatchian a ngai hle a. Thlang  kan tlakna kalkawnga hnam hrang hrang te nen kan in awmpawlh dan te thlengin zir tur leh chhui tur hi a tam em em a. Zohnahthlak unauten harsatna namen lo an tawk a. Kan ram ngeiah pawh Zofate Inpui tiin mi tam tak an rawn tlan khawm mek a. Hetiang anih avang hian mi tamtak thinlungah hnam chungchang a harhtharna - hnam movement a thleng mek a ni. Zohnahthlak hnam te hi kan inzawm dan te, engtia darh sarh ta nge kan nih tih te, engtin nge ram hrang hrang luaha kan lo in mi hran tak tih te hi hrelo tam tak a awm theih avangin kan tobul chhuina kawnga nasa lehzual a ke kan pen hi a tul takzet a ni’, a ti. Art & Culture Minister chuan, ‘he seminar neih mek hi chu bultanna-ah chauh ngai ta ila. Art & Culture Dept. chuan theihtawpa hmalak chhoh kan tum a, zirlaite bakah academic field a kan zirtirtute leh research scholars te pawh kan hmalakna te min tawiawm zel a, tun aia nasa lehzualin hemi kawnga ke pen a kal turin ka fuih duh che u a, ka sawm bawk che u a ni,; a ti bawk.

Seminar neih ni khatnaah hian Prof. Jangkhomang Guite, Nagaland University hnen atangin “Myth, Legend and History : Recent Trends in the Study of Origin and Migration in Northeast India”  tih thupui hmangin paper buatsaih ngaihthlak a ni a. Dr.Lalrinnunga Hmar, Mizoram University hnen atangin “Early Migration of the Mizo People” tih thupui hmangin paper buatsaih ngaihthlak a ni bawk a; Ni khatnaah hian Moderator atan Dr. Laithangpuii, Assistant Professor, ICFAI University, Mizoram leh Mr. Vanlaltana Khiangte, Assistant Professor, ICFAI University te hman an a ni a, hneh takin sawihona hun an kaihruai a ni.

 July 26, 2024 (Zirtawpni) chawhma dar 11:00 atang hian Seminar ni hnihna neih chhunzawm a ni dawn a, Pu Gen Khan Do, Joint Director, Art & Culture Department chuan a kaihruai ang a; Pu Laldova, Mizo Historian, Myanmar chuan “History of Chittagong Hill Tracts: A Chhunga Zofate Chanchin” tih thupui a sawi ang a;  Pu Liandova, Aizawl chuan “Hmasang Pipute Chanchin” tih thupui a sawi bawk ang. Seminar Ni hnihna hi Pu Lalrammawia Ngente, Associate Professor, Govt. Johnson College leh Dr. Laithangpuii, Assistant Professor, ICFAI University, Mizoram-te chuan Moderator niin thupui sawihona an kaihruai dawn a ni.

He Seminar-ah hian Mizo Academy Letters (MAL), Mizo Writers Association, INTACH Mizoram Chapter, Mizo History Association, Zoram Research Foundation leh MZU a Department of History & Ethnography leh Department of Mizo a an faculty leh research scholars te leh ICFAI University zirlaite an tel a ni.