Vawiin December 4, 2023 khan Art & Culture Department leh Kanghmun Branch YMA te buatsaihin Kanghmun khua-ah Cultural Meet neih a ni a, Pu K. Lalruala, Deputy Director (Rtd), Art & Culture Department chu khuallian a ni a. Kanghmun khua leh a chhehvel khaw hrang hrang tangin Mizo hnam lam zai te entirin nilengin hun hman a ni.

Pu R. Lalzawmliana, President, Kanghmun Branch YMA chuan Culturalhi a kaihruai a. Khuallian Pu K. Lalruala chuan thusawiin, 'Culture hi che rengin a thang tur a ni a, chutiang chuan Mizo hnam lam te leh hnam incheina te pawh hi a nihna bo si lovin tih hmasawn a, hmuhnawm zawk leh midangte hip thei tura siam turin tan kan lak zel a ngai a. Kanghmun khua leh a chhehvel khua te hi Mizo culture keh tradition chawinun leh humhalh kawnga theihtawp chhuah thin an ni a, hetiang khua ngeia cultural meet buatsaih amni thei hi a lawmawm a ni a ti. Pu K. Lalruala hi Pu PB Lalrinkima, Prog. Coordinator, Dr. K.C. Runremsangi, Padmashree bakah Art & Culture Department staff engemaw zat ten an tawiawm a ni.

Kanghmun khua-a cultural meet neihah hian Kanghmun khua-a NGO hrang hrang MUP, YMA, MHIP te leh PES School leh Govt. M/S School, Kanghmun atangtein MIzo hnam lam chi hrang hrang entir a ni. Kanghmun chhehvel khua atangin - Khawrihnim, West Lungdar, Darlung, Lungphun, Reiek atang tein Cultural Troupe chi hrang hrangten MIzo hnam  lam chi hrang hrang hmuhnawm tak an entir bawk a ni.

Cultural Meet hi mipuiin an hlut hle a, meet hmanna field chhevel khat tlatin Kanghmun leh a chhehvel khua atangin mipui an pungkhawm a ni.