Vawiin 31st January, 2023 chawhma dar 11:00 khan Pi Carol VLMS Dawngkimi, Director, Art & Culture Department Office Chamber-ah kum 2023 Chapchar Kut Programme Committee chuan kumin March ni 3, 2023 Chapchar Kut lawm dan tur a rel tan a.  Hetih lai hian Mizoram-in Khual tha G - 20 delegates lo kal ten Chapchar Kut an chhim ve theih nan ruahmanna siam a ni.  Programme Committee-ah hian Chapchar Kut-a hun hman dan tur chi hrang hrang te ngaihtuah khawm niin an thurelte hi Chapchar Kut Organising Committee, Pu Zoramthanga, Hon’ble Chief Minister kaihhruaiah pawmpui tur a thehluh leh a ni ang.

January 23, 2023 (Monday) khan Chief Minister Office Conference Hall-ah Chief Minster Pu Zoramthanga leh Co-Chairman Pu R. Lalzirliana, Hon'ble Minster, Art & Culture Department hovin Chapchar Kut 2023 Organising Committee thutkhawm hi neih a lo ni tawh a, kum 2023 Chapchar Kut hi March 3 hian Sipai Lammual-ah hman nise tih a ni. Kum hnih chhung hripui leng avanga Chapchar Kut hman dan thin pangngaia hman theih loh hnuah kumin chu boruak a ziaawm tak avangin a hmaa lo tih thin angin huam zau taka hman ni leh se tih a ni a. He thutkhawmah hian district tin leh state pawna Chapchar Kut lawmna pual sum hman tur chungchang te sawiho niin, a lawmna pui ber Aizawl Lammuala hman dan tur chipchiar chu programme committee in a lo duan tura dah a ni a.

Kumin Chapchar Kut thupui (theme) atan Zofate Inpumkhatna thlan a ni a. Chapchar Kut Souvenir siam leh rel ni bawkin, hetah hian kumina Kut hmanna hlimthla te chuangin post-souvenir a siam leh ni se tih a ni. Kut pual hian mahni remchan dan anga hnam thuam inbel tura inngen ni bawk se tih a ni.

Chapchar Kut Organizing Committee ah hian Chief Minister chu Chairman niin Art & Culture Dept. Minister chu Co-Chairman a ni a. Art & Culture Secretary chu Vice-Chairman niin, CYMA General Secretary chu Secretary a ni a. Art & Culture Dept. Under Secretary chu Asst. Secretary niin Art & Culture Dept. Deputy Director/DDO chu Treasurer a ni.