Vawiin December 5, 2023 khan Art & Culture Department leh Langkaih Group YMA te tangkawp buatsaih Langkaih Group YMA Cultural Meet - 2023 chu Zawlnuam Vengpui Playground-ah neih a ni a, Pi Carol V:LMS Dawngkimi, Director, Art & Culture Department chu khuallian a ni.
Cultural Meet hi Pu H. Lalfelkima, Langkaih, Langkaih Group YMA Treasurer in a kaihruai a, Langkaih Group YMA Secretary Pu Malsawmtluanga'n report peiin Pu J. Malsawma, President, Langkaih Group YMA in inlawmna thu a sawi a ni.
He Cultural Meet a Khuallian Pi Carol VLMS Dawngkimi chuan Cultural Meet a lo kalkhawmte hnenah Art & Culture Deptt. hminga lawmthu a sawi a, Langkaih Group YMA Cultural Meet hman ho a ni thei chu lawmawm a tih thu a sawi. Langkaih Group YMA hruaitute in pekna ropui a tih thu a sawiin. Art & Culture Deptt. chuan kan hnam lam leh zai te, kan hnam nunphungte humhalh a, chawinun zel hi kan tum ber leh kan hna ber a nih avangin Mizoram puma YMA te nena thawh ho zel chu Art & Culture Deptt chuan a duh tak zet a ni, a ti bawk.
Cultural Meet-ah hian Langkaih Group YMA huamchhunga khaw hrang hrang atangin MIzo hnam lam leh zai te entir a ni a. Tin, Khuallam intihsiak neih niin intihsiak hi Pu MS Ralte, leh Nl Estheri Lalrinhlui, Art & Culture Department ten an endik a ni.
.
