Vawiin September 11, 2023 chawhma dar 10:00 khan Vanapa Hall, Aizawl-ah Art & Culture Department leh Mizo Writers Association tangkawpin an buatsaih 'Lehkhabu Pho Runpui (LPR Vawi 3-na) chu hawnna inkhawm neih a ni a. Pu Gen Khan Do, Joint Director, Art & Culture Department chu khuallian a ni.

Inkhawm hi Pu R. Lallianzuala, President, MWA -in a kaihruai a, Pu C.H. Thangkhuma, Exe Comt. Member, MWA chuan hunserh a hmang. Pu H. Ngurthansanga, Secretary, MWA chuan Report a pe a, Tv. K. Remruatfela, Secretary, Organising Commt. chuan Lehkhabu Pho Runpui report a pe bawk. Lehkhabu tlangzarh hi Tv. Lalthantluanga leh Nl. Gladys Lalhruaitluangi ten an buaipui a. Khuallian Pu Gen Khan Do chuan heng lehkhabute hi a tlangzarh nghal a ni.

Khuallian, Pu Gen Khan Do chuan thusawiin, 'ziak mi hlu tak tak kan neih te hi ram leh hnam tana rohlu an ni a, an ni kut ziak hlu tak kan hmu zel thei hi a vanneihthlak a, thangthar lehkha thiam leh zir mek ten degree sang tak tak lak nan an hmang a, an la hmang zel dawn bawk a ni a ti'.

LEHKHABU PHO RUNPUI vawi thumna hman mek hi ni 11th – 16th September, 2023 chhung hian Vanapa Hall-ah nitin zing dar 9:30 atanga tlai dar 5:30 thleng hawn thin a ni ang a, Ni 16 September, 2023 (Inrinni) bik erawh hi chawhnu dar 1:00 thleng hawn ang a, tlai dar 3:00-ah Vanapa Hall hulhliapah vek kharna hun hman a ni ang.

Lehkhabu Pho Runpui hawn ni hian lehkhabu 17 lai a hlawma tlangzarh niin Khuallian Pu Gen Khan Do chuan heng lehkhabute hi a tlangzarh a ni. . chungte chu : 

(i)   Ka hla phuah leh lehlinte - Rozama Chawngthu

(ii)   Thinlung Tuihna - Tharbawihi Colney

(iii)   Ruam Rai Thuruk - C. Lalnunchanga

(iv)   Mizo Culture - B. Lalthangliana

(v)   Tales of Man Singh - Lalzarzova Khiangte (Letlingtu)

(vi)  Sunsets and Lovers - Debbie Rinawmi

(vii) Lo neitu fapa - R. Vahnnuaithanga

(viii)Ka rawn fang leh - C. Laizawna

(ix) Krismas Drama - Mamawii Colney

(x) Manipur Rambuai - Tluanga Chhakchhuak

(xi) Kei leh Salem Boarding - C. Rochungnunga

(xii) Ziakfung Zalen - H. Lalawmpuia

(xiii) Naupang enkawl leh kaihhruai dan - C. Lalrinchhana

(xiv) Zukbual - R. Nelsona

(xv) Mizote thlang tlak dan - C. Chhuanvawra

(xvi) Khawhar hla bu - C. Chhuanvawra

(xvii) Tuipui ral fan thu – Mizo Writers Association

Lehkhabu Pho Runpui huna lehkhabu dahtute hian ‘Mizo Writers Association’ (MWA) library-a dah turin  an lehkhabu rawn pho atanga pakhat zel hi pe (donate) tura beisei an ni. Lehkhabu Pho Runpui huna lehkhabu rawn pho tur hian ‘Mizo Writers Association’ (MWA) member 115 an rawn in report a, Lehkhabu pho rùnpui hi Ziak mite chawi sanna tur liau liauva huaihawt a ni a. A lehkhabu hralhna zawng zawng pawh hi lehkhabu neitute kutah zel a lut ang. "Mizo Writers Association" hian a pawl anga a sum leh pai zawnga hlawkna tel tur pakhat mah a nei lo a ni.

He lehkhabu Pho Runpui 2023-ah hian Art & Culture Department atangin Tribal Research Institute chuan lehkhabu chi hrang hrang 40 (a vaiin 400) an pho chhuak a; Mizoram Publication Board chuan lehkhabu 178 (a vaiin 800) an pho chhuak bawk.

Tribal Research Institute

Mizoram Publication Board