Vawiin Vau thla ni 31, 2023 (Zirtawpni) hian ICFAI UNIVERSITY, MIZORAM chuan ICFAI UNIVERSITY CAMPUS-ah LENLAI FEST 2023 hlimawm tak an hmang a. Pu Lalchuailova, Dy. Director Art & Culture Department, Govt. Of Mizoram chuan Khuallian niin he hun hi a hmanpui.
Khuallian Pu Lalchuailova chuan thusawiin, 'Lenlai Fest hmang tura kal khawmte chu an nunphungah Mizo hnam nun vawng him tlat turin a chah a, Mizote chu hnam dang laka kan inchhuan ve theihna ber Tlawmngaihna leh Aia Upa Zah chu theih ang tawka chhawm chho zel turin a chah a, changkanna nena ke kan pen rualin kan hnam nun zemawi bosal lo turin a chah bawk. Kristianna leh hnam nunzia chu kal kawp tlat tir turin a chah a, kan hnam zia humhim a veng him turin keini lo chu kan awm lo tiin a sawi bawk a ni.
He hunah hian - Zai, Hlado chham leh Mizo rimawi hrang hrang hmangin kal khawmte an awi a ni. Lenlai Fest 2023 hi ni hnih awh tur a ni a. A ni khatna hi Cultural day puala hun hman tur a ni a. Hnam lam intihsiakna bakah tlai lam concert te pawh buatsaih a ni. He hunah hian University chhung leh pawn aṭangin stall hrang hrang siam a ni a. Ei leh in tur tuihnai tak tak leh Mizo thil siam hrang hrangte lei theih tura zawrh chhuah a ni. A ni hnihna hi Ṭau thla ni 1 (Inrinni) hian a hmun ngaiah hman leh tur a ni a. Beat contest leh concert-in hun hman a ni dawn a, he huna tel tur hian mi zawng zawng an sawm nghal bawk a ni.
