Vawiin November 17, 2022 (Ningani) chawhma dar 10:00AM atang khan nilengin Art and Culture Deparment & Cultural Meet Organising Committee, Lungdai tangkawpin an buatsaih Cultural Meet - 2022 chu Lungdai YMA Hall kawt-ah neih a ni a. Pu K. Laldawngliana, MLA (Tuirial Constituency) chuan Khuallian niin Cultural Meet hi a hmanpui a. Pu K. Lalruala, Dy. Director, Art & Culture Department chu Khual Zahawm a ni.

Lungdai Cultural Meet-2022 hi Pu C. Lianhmingthanga, Cultural Meet Working Committee Chairman-in a kaihruai a, Khuallian Pu K. Laldawngliana, MLA chuan thusawiin, "Mizote hi hnam taima, huaisen, rintlak leh tlawmngai kan ni a, Mizo hnam nunze mawi chhawmnun zel kawngah heng tlawmngaihna te, aia upa zah te hi kalsan mai lovin changkanna nen hian kan zonun zemawi kan lantir zel tur a ni," a ti a. Khuallian hian Cultural Meet hmang tute chu nu leh pa thuawih turte, Kristian nundan tha ngaisang zel turte leh hnam rinawm kan nihna chhawm nung zel turin a chah bawk. 

Lungai Cultural Meet-2022 ah hian Lungdai khua bakahTuirial Constituentcy huamchhunga khaw hrang hrang leh school hrang hrang atangin Cultural Troupe engemaw zat an tel a, tin, MHIP Lungdai Branch-in Mizo La Deh Dan an entir a, MUP Lungdai Unit tangin Mizo Thang Kam Dan hmuhnawm tak entir niin mitham sawm bik ten Thiam Hnang Deh an entir bawk.

Khual Zahawm Pu K. Lalruala, Dy Director, Art & Culture Department-in thu a sawi bakah Pu Lalzara Colney, President, Lungdai Cultural Club-in lawmthu sawina hun a hmang a ni.  Khuallian Pu K. Laldawngliana hian Cultural Meet Organising Committee, Lungdai hnenah Rs. 1,5000 a pe a. Hemi hma hian he Cultural Meet buatsaih anih theihnan hian Bialtu MLA leh Art & Culture Department-te chuan Rs. 150,000/- ve ve an lo pe tawh bawk a ni.